Azərbaycan Premyer Liqasının VII turunda “Zirə” ilə hesablı heç-heçə edən  (1:1) “Şamaxı”ı əlamətdar göstəriciyə imza atıb.

Peşəkar Futbol Liqasının (PFL) məlumatına görə, vaxtilə “Xəzər Universiteti”, “İnter” və “Keşlə” adları ilə çıxış etmiş paytaxt təmsilçisi ölkə çempionatlarının yüksək dəstəsində 900-cü qolunu vurub. Yubiley qolunun müəllifi Şuaybu Abdullai olub.

Bu qol “Şamaxı”nın Premyer Liqadakı 733-cü oyununda qeydə alınıb. Komanda ev oyunlarında 482, səfər görüşlərində isə 418 qol vurub. Ümumi qol sayına görə şamaxılılar yalnız “Qarabağ”, “Neftçi” və “Kəpəz”dən geri qalır.

Klubun yüksək dəstədə ilk qolu 1999-cu il noyabrın 7-də “Neftçi” ilə qarşılaşmada vurulub. Həmin görüşdə 2:3 hesabı ilə məğlub olan komandanın ilk qoluna Samir Ələkbərov imza atıb.

“Zirə”nin müdafiəçisi Amin Seydiyev üçün də VII tur əlamətdar olub. O, Azərbaycan Premyer Liqasında 200-cü oyununa çıxıb. 2018/19 mövsümündə debüt edən müdafiəçi indiyədək bir neçə klubun formasını geyinib və çempionatda 6 qola imza atıb.