Dünya çempionatının qrup mərhələsinin ikinci turunda Argentina millisi Avstriyanı 2:0 hesabı ilə məğlub edib. Qarşılaşmada dubla imza atan 38 yaşlı Leo Messi, mundiallar tarixində vurduğu qolların sayını 18-ə çatdıraraq yeni rekorda imza atıb.
Bu tarixi matçı tribunadan izləyənlər arasında dünyaşöhrətli müğənni Şakira və oğulları Saşa ilə Milan da olub. Şakira matçdan sonra sosial şəbəkə hesabında Messiyə xüsusi post həsr edib: “Səninlə və ailən, ölkən, bütöv Latın Amerikası xalqı üçün qazandığın bu tarixi uğurlarla qürur duyuram, Leo! Sənin əzmkarlığın və fədakarlığın milyonlara ilham verir. Parlamağa davam et!”
Xatırladaq ki, Şakira bu ilki dünya çempionatının rəsmi himni olan “Dai dai” mahnısının müəllifidir və o, turnirin açılış mərasimində də çıxış edib. Kolumbiyalı ulduz təkcə Argentinanın qələbəsini deyil, eyni zamanda Fransa millisinin uğurunu da qeyd edib. Didye Deşamın yetirmələri İraqı 3:0 hesabı ilə darmadağın edərək vaxtından əvvəl 1/16 finala vəsiqəni təmin ediblər. Fransa yığmasının rəsmi instaqram postunu paylaşan sənətçi, yazıya “Möhtəşəmsən, Fransa!” şərhini əlavə edib.