“Sabah” klubu heyətini gücləndirdiyi yeni müdafiəçisi Eyden Makkartinin transferi ilə bağlı maraqlı detallar üzə çıxıb. “Bayquşlar”ın Cənubi Afrikanın “Kayzer Çifs”dən heyətinə qatdığı müdafiəçinin transfer dəyəri məlum olub.

“African Times” nəşrinin məlumatına görə, paytaxt təmsilçisi bu transfer üçün qarşı tərəfə təxminən 720 000 manat ödəyib.

Müqavilədə maraqlı şərt də yer alıb: futbolçunun gələcək satışından əldə olunacaq məbləğin 10 faizi yenidən Afrika klubuna ödəniləcək.

Xatırladaq ki, Makkarti “Sabah”ın müdafiə xəttindəki boşluqları doldurmaq üçün atılan ən vacib addımlardan biri kimi qiymətləndirilir.

22 yaşlı müdafiəçi “Kayzer Çifs”in əsas heyətində parlaq debüt mövsümü keçirib. O, ilk tam mövsümündə bütün turnirlərdə 33 matçda meydana çıxaraq 2 qolla yadda qalıb. Makkartinin stabil çıxışı “Kayzer Çifs”in “Betway” Premyer Liqasında 3-cü yeri tutmasına və CAF Konfederasiya Kubokuna vəsiqə qazanmasına kömək edib.

Futbolçunun inkişafı təsadüfi deyil, o, klubun akademiyasından başlayaraq müxtəlif yaş qruplarında çıxış edib. 2024/25 mövsümünün sonuna yaxın əsas heyətə cəlb olunan müdafiəçi, ötən il özünü əsas heyətin dəyişilməz üzvü kimi təsdiqləyib.

“Kayzer Çifs”in idman direktoru Kayzer Motaunq-kiçik transferlə bağlı fikirlərini bölüşüb: “Sabah” klubundan gələn təklifdən sonra Eydenin transferi ilə bağlı razılığa gəldik. Onun gələn mövsüm UEFA Çempionlar Liqasının təsnifat mərhələsində çıxış edəcək komandaya qoşulması bizim üçün qürurvericidir. İnanırıq ki, Eyden Avropada “Amakosi”nin (klubun ləqəbi) adını layiqincə təmsil edəcək. Onun dünya arenasında inkişafını izləməyi səbirsizliklə gözləyirik”.