AFFA-nın İntizam Komitəsi növbəti iclasında Azərbaycan futbolunda baş verən son oyunların nəticələri və qayda pozuntuları ilə bağlı qərarlarını açıqlayıb.

İclasda ən ağır cəza “Sabah” klubuna verilib. “Bayquşlar”ın futbolçusu Joy-Lance Mickelsin aqressiv davranışına görə birbaşa qırmızı vərəqə alması klubun 3000 manat cərimələnməsinə səbəb olub. Oyunçunun özü isə 2 oyunluq cəzalandırılıb (1 oyun şərti olmaqla, 6 ay sınaq müddəti ilə).

“Neftçi” klubu isə yarımmüdafiəçisi Emil Səfərovun ikinci sarı vərəqə ilə meydandan qovulması səbəbindən 500 manat cərimələnib. Futbolçu avtomatik olaraq 1 oyunluq diskvalifikasiya edilib.

“Turan-Tovuz” “Şamaxı” ilə matçda komanda üzvlərinin çoxsaylı sarı vərəqə alması səbəbindən 700 manat cərimə ödəməli olacaq.

Aşağı liqalarda keçirilən oyunlarda da intizam qaydalarına riayət olunması diqqətdə saxlanılıb. I Liqanın 26-cı turunda qeydə alınan müxtəlif qayda pozuntularına görə klublar ümumilikdə 1230 manat cərimələnib.

II Liqanın 27-ci turunda isə vəziyyət daha ciddi xarakter alıb. Turun yekunlarına görə klublara ümumilikdə 7460 manat cərimə kəsilib. Xüsusilə “Araz-Saatlı” və “Kür-Araz” komandaları arasında keçirilən matçda baş verən xoşagəlməz hadisələr ciddi nəticələrə yol açıb. Hər iki komanda 3770 və 2500 manat məbləğində cərimələnib, hər iki tərəfə 0:3 hesablı texniki məğlubiyyət verilib. Bundan əlavə, “Kür-Araz” klubu yeni mövsümdə keçirəcəyi növbəti 5 ev oyununda azarkeşsiz oynamaq cəzası alıb.