Mövsümü “qızıl dubl”la başa vuraraq möhtəşəm uğura imza atan “Sabah”, yeni mövsümün transfer çalışmalarına start verib. Növbəti mövsümdə ölkəmizi Çempionlar Liqasında təmsil edəcək Masazır təmsilçisi heyətini perspektivli legionerlə gücləndirir.

Fransanın nüfuzlu “L’Equipe” nəşrinin yaydığı məlumata görə, “bayquşlar” “Lill”in 21 yaşlı vingeri Yunes Laçaabın transferini həll edib. Fransa klubunun əvəzedici komandasında çıxış edən sol cinah hücumçusu artıq “Lill”in düşərgəsini tərk edib. Gənc istedadın yaxın günlərdə Bakıya gələrək rəsmi müqaviləyə imza atacağı gözlənilir.

Qeyd edək ki, “Lill” ilə 2028-ci ilin yayına qədər rəsmi sözləşməsi olan Əlcəzair əsilli futbolçunun transfer şərtləri hələlik tam açıqlanmır. “Transfermarkt” portalının məlumatına görə, gənc vingerin hazırki bazar dəyəri 50 min avro təşkil edir. Sürəti və texnikası ilə seçilən Laçaabın transferi, “Sabah”ın gələcəyə yönəlik heyət qurmaq strategiyasının növbəti addımı hesab olunur.