“Zirə”nin baş məşqçisi Rəşad Sadıqov Misli Premyer Liqasının 33-cü turunda “Araz-Naxçıvan”a qarşı keçirilən mövsümün son matçından sonra mətbuatın suallarını cavablandırıb.

Gərgin keçən və 2:3 hesablı məğlubiyyətlə başa çatan qarşılaşmanı şərh edən mütəxəssis, komandasının motivasiya çətinliklərinə baxmayaraq, əzmkarlıq nümayiş etdirdiyini vurğulayıb: “Mövsümün son matçına çıxırdıq və turnir cədvəli baxımından bizim üçün heç bir hədəf qalmamışdı. Belə vəziyyətdə oyuna köklənmək həmişə çətindir. Buna baxmayaraq, futbolçularım meydanda böyük fədakarlıq göstərdilər. Hər iki komanda qələbə üçün oynayırdı və heç-heçə daha ədalətli nəticə olardı. Təəssüf ki, bəzi epizodlarda çox sadə qollar buraxdıq. Artıq mövsüm arxada qaldı, indi gələcəyə fokuslanmalıyıq. Futbolçularıma, azarkeşlərimizə və klub rəhbərliyinə dəstəklərinə görə təşəkkür edirəm. Mövsüm ərzində üç cəbhədə mübarizə apardıq, amma sonda uğur üçün bir az çatışmazlıq oldu”.

Mövsümün yekunlarını dəyərləndirən Rəşad Sadıqov, avrokuboklarda iştirak edəcək digər klublarımıza uğurlar arzulayıb: “Bütün mükafatçıları təbrik edirəm. Avrokuboklarda iştirak edəcək komandalarımıza uğurlar arzulayıram. Ümid edirəm və gözləyirəm ki, bu mövsüm ən azı üç klubumuz avrokubokların pley-off mərhələsinə qədər irəliləyəcək. Onların hamısı bunu haqq edir”.

Baş məşqçi, ölkə futbolundakı bəzi problemlərə də toxunaraq, meydanların keyfiyyəti və stadionsuzluq probleminin oyunların səviyyəsinə təsir etdiyini qeyd edib: “Futbolumuzdakı meydanların durumu və klubların tez-tez stadion dəyişməsi məni çox narahat edir. Bu barədə daha ətraflı danışmaq istərdim, lakin mövsümü məğlubiyyətlə tamamladığımız üçün fikirlərim yanlış anlaşıla bilər”.