“Espanyol” (2:1), “Real Sosyedad” (4:1) və “Malaqa” (4:0) üzərində qazanılan qələbələrlə “Real”dakı karyerasına uğurlu start verən Joze Mourinyu komandanın oyunundan tam razı deyil. İspaniya mətbuatının məlumatına görə, portuqaliyalı mütəxəssis futbolçularından birinin çıxışından bərk qəzəblənib və dərhal radikal addım atıb.

Mövsümün ilk iki matçında start heyətdə yer alan sol cinah müdafiəçisi Alvaro Karreras ikinci görüşün fasiləsində əvəzlənərək əsas heyətdəki yerini itirib. “AS” nəşri yazır ki, gənc futbolçu xüsusilə “Real Sosyedad”la matçın uğursuz keçən ilk hissəsində komandanın ən zəif halqalarından biri olub. Mourinyunun səbrini daşıran son damla isə Luka Suçiçin vurduğu qol epizodu olub. Rəqibə qarşı ləng davranan və zərbənin qarşısını ala bilməyən Karreras dərhal ehtiyat skamyaya əyləşdirilib. Onu əvəz edən və hazırda yüksək mübarizə əzmi nümayiş etdirən Mark Kukurelya isə mövqeyində möhkəmlənməyi bacarıb.

“Real”ı qarşıda gərgin oyunlar gözləyir. Paytaxt təmsilçisi növbəti matçlarında “Betis” (4 sentyabr), “İnter” (8 sentyabr), “Rayo Valyekano” (12 sentyabr), “Elçe” (15 sentyabr), “Atletiko” (20 sentyabr) və “Vilyarreal”la (11 oktyabr) üz-üzə gələcək.