Azərbaycan Kubokunun finalında “Sabah”a 1:2 hesabı ilə məğlub olan “Zirə”nin baş məşqçisi Rəşad Sadıqov qarşılaşmanı şərh edərkən, rəqibin fərdi ustalığının matçın taleyində həlledici rol oynadığını bildirib.

Görüşün debütünü uğurlu hesab edən Sadıqov, komandasının hesabı açdıqdan sonra uzun müddət etibarlı müdafiə olunduğunu bildirib: “Matça yaxşı başladıq, hesabı açdıq və təxminən 35 dəqiqə ərzində rəqibə imkan vermədik. İkinci qolu vurmaq şansımız da var idi. Lakin ikinci hissədə rəqib fantastik qolla tarazlığı bərpa etdi. Biz hücumda aktivliyi artırdıqca, əks-hücumda ikinci qolu buraxdıq. Futbolçularıma təşəkkür edirəm, çox güclü rəqibə qarşı layiqincə mübarizə apardılar. “Sabah”ın vurduğu qollar böyük ustalığın nəticəsi idi”.

Qismət Alıyevin erkən sarı vərəqə almasının nəticəyə təsiri və hakimlik barədə danışmaq istəməyən baş məşqçi, diqqəti Misli Premyer Liqasındakı gərgin yarışa yönəldib. O, çempionluq mübarizəsindən qopmadıqlarını qeyd edib: “Heç nə bitməyib. Rəqibin bizdən 3 xal öndə olduğunu bilirik, qarşıda bizi “Araz-Naxçıvan” və “Sumqayıt”la çətin sınaqlar gözləyir. Özümüzdə güc tapıb, sonuna qədər döyüşəcəyik”.

Karyerasında üçüncü dəfə kubokun finalında məğlub olan Sadıqov, büdcə və heyət keyfiyyəti ilə bağlı suallara təmkinlə yanaşıb. O, titul qazanmasalar da, göstərilən sabitliyin önəmli olduğunu vurğulayıb: “Daha böyük büdcəli klubda nəticənin necə olacağını əvvəlcədən demək çətindir. Amma bu üç finala nəzər salsaq, hər şey plan üzrə getsəydi, üçünü də qazana bilərdik. İştirak etdiyimiz 12 turnirin 6-da mükafatlar uğrunda sonadək vuruşmuşuq. Bəli, titul yoxdur, amma mən oyunçularımla fəxr edirəm. Qələbə üçün bəzən daha artığı lazımdır”.