Premyer Liqanın V turunda “Zirə” ilə səfər matçında (1:1) heç-heçə oynayan “Qarabağ”ın baş məşqçisi Qurban Qurbanov qarşılaşmadan sonra keçirilən mətbuat konfransında medianın suallarını cavablandırıb.

Təcrübəli mütəxəssis oyunun gedişatını, komandaya yeni qoşulan futbolçuların performansını dəyərləndirib və heyətdən kənarlaşdırılan Abbas Hüseynovun gələcəyi ilə bağlı xəbərlərə aydınlıq gətirib.

Qurban Qurbanov qarşılaşmanın yüksək tempdə keçdiyini və qeydə alınan heç-heçənin hər iki komandanın oyununa uyğun ədalətli nəticə olduğunu bildirib: “Ümumilikdə son dəqiqəyə qədər gərginliyi ilə seçilən, çox maraqlı bir matç izlədik. Meydanda keyfiyyətli və dinamik hücumlar gördük. Hər iki komanda ən azı bir xala layiq idi, zənimcə, heç-heçə ən ədalətli nəticə oldu. Bizə gəldikdə isə, hər matçdan-matça daha inamlı təsir bağışlayırıq və sahədə istədiyimiz müsbət elementləri daha çox görürəm. Oyun kombinasiyalarımız günbəgün cilalanır. Aktivimizə bir xal yazdıq, indi qarşıdakı oyunlara hazırlaşacağıq”.

Təcrübəli çalışdırıcı “Zirə” ilə matçda debüt edən yeni transferlərin fiziki durumuna da toxunub: “Yenilərin çıxışını normal qiymətləndirirəm. Onlar hələ ki, öz optimal formalarından uzaqdırlar. Buna baxmayaraq, az oynayan və ya komandaya yeni qoşulan futbolçulara şans veririk ki, kollektivdəki ab-havanı və oyun dinamikasını daha yaxşı hiss etsinlər. Onların hazırda tam hazır olmadıqlarını anlayırıq və adaptasiya prosesini sürətləndirmək istəyirik. Önümüzdə milli komandaların oyunları ilə bağlı fasilə yaranacaq. Düşünürəm ki, bu vaxtdan səmərəli istifadə edərək onları pik formaya çatdıra biləcəyik”.

Mətbuat konfransında müdafiəçi Abbas Hüseynovun əvəzedici heyətin matç ərizəsinə salınması və onun Elvin Cəfərquliyev kimi əsas komandaya qayıtma ehtimalı da gündəmə gətirilib. Qurban Qurbanov bu iddialara kəsərli cavab verərək mövzuya nöqtə qoyub: “Xeyr, belə bir ehtimal yoxdur. Futbolçunun özünə hər şey əvvəlcədən bildirilib. Bu mövzuda daha müzakirə olunacaq heç bir məqam qalmayıb”.