Çempionlar Liqasının 4-cü turundan sonra “Qarabağ”ın pley-off raunduna çıxması üçün şansları yüksəkdir. Riyazi hesablamaya görə 11-12 xal pley-off mərhələsinə çıxmaq üçün kifayət edir. Ağdam klubunun daha 4 xal üçün hansı oyuna ümid etməlidir. Qarşıda Neapol səfəri var. “Napoli” geridə qalan turlarda sabit təsir bağışlamayıb və növbəti raunda çıxacaq sıralamanın lap sonunda yer tutub. Bu baxımdan noyabrın 25-də “Qarabağ”la oyun italyanlar üçün həlledici olacaq. Xal itkisi onları çətin duruma sala bilər. Bu səbəbdən ağdamlıları çətin sınaq gözləyir.

“Köhlən atlar” 3 xala 6-cı turda ümid edə bilər.  Dekabrın 10-da Bakıya gələcək “Ayaks” heç də yaxşı vəziyyətdə deyil. Keçirdiyi bütün oyunlarda məğlub olan amsterdamlılar sonuncu pillədə qərarlaşıb və oyun keyfiyyətinə görə də qarabağlıların dişinə görədir. Yanvarın 1-də Bakıya gələcək “Ayntraxt”dan da baş açmaq olmur. “Qalatasaray”ı ilk turda darmadağın edərək canımıza vəlvələ salan almanlar bundan sonra qalan 3 oyunda yalnız bir heç-heçə ilə yadda qaldı. Şübhəsiz, frankfurtlular çətin rəqibdir, amma 1 xal götürmək olar. Bu oyunun nəticəsi “Qarabağ”ın yanvarda hansı formada olmasından asılı olacaq. Son turda “Liverpul”la oyun vahiməli görünür. Təbii ki, bu oyundan xal almaq şansımız cüzidir. Yeganə ümid onadır ki, o vaxta qədər şansını təmin etmiş “qırmızılar” oyuna ikinci heyətlə çıxsın və barmaqarası yanaşsın.