Xorvatiya “Riyeka”sının kapitanı və Bosniya və Herseqovinya millisinin qapıçısı Martin Zlomisliç karyerasını ölkəmizdə davam etdirməyə yaxındır.

Xorvatiyanın “Germanijak” nəşrinin yaydığı məlumata görə, “Qarabağ” 27 yaşlı qolkiperin transferi ilə bağlı danışıqları yekunlaşdırmaq üzrədir. Tərəflər arasında keçidlə bağlı demək olar ki, bütün detallar razılaşdırılıb və hazırda yalnız bəzi texniki məsələlərin həlli qalıb.

Məlumata əsasən, Ağdam təmsilçisi bu transfer üçün “Riyeka”ya təxminən 500 min avro təzminat ödəyəcək. Zlomisliçin Xorvatiya klubu ilə hazırkı müqaviləsinin müddəti 2026/2027-ci illər mövsümünün sonuna qədərdir.

Növbəti mövsümdə həm daxili arenada, həm də avrokuboklarda iddialı çıxışını davam etdirməyi hədəfləyən “Qarabağ”, heyətin gücləndirilməsi istiqamətində ilk ciddi addımlardan birini atır. 2026-cı il Dünya Çempionatının startı ərəfəsində gerçəkləşməsi gözlənilən bu transferin Ağdam klubunun qapı xəttini daha da etibarlı edəcəyi bildirilir.