“Sabah”ın Çempionlar Liqasındakı rəqibi “Slaviya” ilə “Sparta” arasında keçirilən Praqa derbisi tribunada baş verən siyasi qalmaqalla gündəmə gəlib. Matçın sonlarına yaxın “Sparta” azarkeşlərinin yer aldığı sektorda Serbiyanın bayrağı və hərbi cinayətkar Ratko Mladiçə həsr edilən “Ruhun şad olsun, general” yazılı pankart nümayiş etdirilib.

 Bosniyada mülki əhaliyə qarşı törədilən soyqırıma görə Haaqa məhkəməsi tərəfindən ömürlük həbs cəzasına məhkum edilən və bu yaxınlarda həbsxanada dünyasını dəyişən “Bosniya qəssabı” ləqəbli Mladiçə verilən bu dəstək böyük etiraza səbəb olub. Aksiya zamanı azarkeşlərdən birinin əynində Rusiya-Ukrayna müharibəsinin rəmzi sayılan “Z” simvollu geyimin olması da diqqətdən qaçmayıb.

“Sparta” klubunun ictimaiyyətlə əlaqələr direktoru Pavel Yina məsələ ilə bağlı dərhal açıqlama verərək, klubun bu insidentdən tamamilə uzaq olduğunu bildirib. O, pankartın fərdi aksiya olduğunu, dərhal yığışdırıldığını və qaydaları pozan azarkeşlərə qarşı stadiona giriş qadağası da daxil olmaqla sərt sanksiyaların tətbiq ediləcəyini vurğulayıb.

Srebrenitsa Soyqırımı Memorial Mərkəzi də baş verənlərə kəskin reaksiya verərək, hərbi cinayətkarların bu cür təbliğ olunmasını münaqişə qurbanlarının xatirəsinə təhqir adlandırıb və UEFA-nı oxşar hallara qarşı barışmaz mövqe tutmağa çağırıb.

Xatırladaq ki, qarşılaşma “Slaviya”nın böyükhesablı qələbəsi ilə başa çatıb – 3:0. 6 oyuna 14 xal toplayan “Sabah”ın rəqibi bu qələbə sayəsində ölkə çempionatında liderliyə yüksəlib.