UEFA Çempionlar Liqasının 2025/26 mövsümünün ilk yarımfinal qarşılaşması futbol tarixinə düşəcək dramatik hadisələrlə yadda qaldı. “Park de Prens” stadionunda keçirilən PSJ – “Bavariya” dueli əsl qol düellosuna çevrildi. Doqquz qolun vurulduğu bu tarixi gecədə Paris təmsilçisi 5:4 hesablı çətin qələbə qazanaraq final yolunda üstünlük əldə etdi.
Hər iki komandanın baş məşqçisi sürprizlərdən qaçaraq sınaqdan çıxmış sxemlərə üstünlük vermişdi. Vensen Kompaninin “Bavariya”sı zədə səbəbindən DÇ-2026-nı qaçıracaq Qnabrinin yoxluğunda, Harri Keynin arxasında Camal Musialaya şans vermişdi. Sol cinahda isə sürətli Hakimi ilə mübarizə aparmaq üçün Alfonso Devisin seçilməsi məntiqi addım idi.
Luis Enrikenin rəhbərlik etdiyi PSJ-də isə mərkəz müdafiəsində Markinyos Zabarnını əvəz etdi, zədədən dönən Vitinya isə birbaşa start heyətində yer aldı
Oyun “Bavariya”nın “cəhənnəm” startı ilə başladı. Qonaqlar ilk dəqiqələrdən rəqibi boğucu pressinqlə sıxışdırdı. Lakin bu təzyiq Luis Enrikenin planının bir hissəsi idi. PSJ kompakt müdafiə olunaraq rəqibi irəli çəkir və sürətli əks-hücumlarla cəzalandırmağa çalışırdı.
Hesabı 17-ci dəqiqədə qonaqlar açdı. Sandro Şererin təyin etdiyi penaltini Harri Keyn dəqiq yerinə yetirərək turnirdəki 13-cü qoluna imza atdı. O, bu göstəricidə yalnız Kilian Mbappədən (15 qol) geri qalır. Ardıcıl səkkizinci matçda fərqlənən ingilis hücumçu, cari mövsüm çıxdığı 47 rəsmi oyunda vurduğu qolların sayını 55-ə çatdırıb.
24-cü dəqiqədə Xviça Kvaratsxeliya Stanişiçi asanlıqla keçərək hesabı bərabərləşdirdi. Az sonra Joau Neveş künc zərbəsindən sonra başla vurduğu qolla PSJ-ni önə keçirdi.
Birinci hissənin sonları daha dramatik keçdi. Maykl Olise 41-ci dəqiqədə status-kvonu bərpa etsə də, fasiləyə saniyələr qalmış Usman Dembele mübahisəli penaltini qola çevirərək komandasını yenidən önə çıxardı – 3:2.
İkinci yarıya daha sürətli başlayan PSJ rəqibi şoka saldı. 56-cı dəqiqədə Vitinya və Hakiminin başladığı hücumu Kvaratsxeliya dublla tamamladı. Cəmi iki dəqiqə sonra Dembele rəqib müdafiəsinin səhvindən yararlanaraq hesabı 5:2-yə çatdırdı.
Darmadağın olmaq təhlükəsi ilə üzləşən “Bavariya” xarakter nümayiş etdirdi. Öncə 65-ci dəqiqədə Upamekano fərqi azaltdı, üç dəqiqə sonra isə Luis Dias Keynin möhtəşəm ötürməsini qola çevirərək hesabı minimuma endirdi.
Matçın rəqəmləri
Tarixi nəticə: Çempionlar Liqası yarımfinallar tarixində ilk dəfə bir oyunda 9 qol vuruldu.
Xviça Kvaratsxeliya faktoru: Gürcü ulduz bir mövsümdə “qol+pas” sistemində 15 xal (10 qol, 5 asist) toplayaraq PSJ-nin rekordunu qırdı.
Markinyosun yubileyi: Braziliyalı müdafiəçi turnirdə 120-ci oyununa çıxaraq əfsanəvi Roberto Karlosun rekordunu təkrarladı.
Çempionlar Liqası, 1/2 final (İlk oyun)
PSJ – Bavariya 5:4 (3:2)
Qollar: Kvaratsxeliya, 24, 56; Neveş, 33; Dembele, 45+5 (p.), 58 — Keyn, 17 (p.); Olise, 41; Upamekano, 65; Dias, 68.