Konfrans Liqasının birinci təsnifat mərhələsinin cavab oyununda Litvanın «Hegelman» klubunu 3:0 hesabı ilə məğlub edən Estoniyanın «Paide» komandası növbəti mərhələyə adlayıb. Ümumi 4:1-lik hesab estoniyalıların ikinci mərhələdə «Zirə» ilə qarşılaşmasını şərtləndirib.

Oyunsonrası mətbuat konfransında çıxış edən «Paide»nin baş məşqçisi Tarmo Kink komandasının çıxışını şərh edib və qarşıdakı rəqiblə bağlı fikirlərini bölüşüb.

Kink qələbənin əsas səbəbi kimi futbolçuların yüksək konsentrasiyasını göstərib. «Oyun zamanı bir anlıq diqqətsizlik böyük fəsadlara səbəb ola bilərdi. 3-cü qol matçın taleyini həll etdi, oyunun keyfiyyətində hələ artım üçün potensialımız var, lakin mövcud vəziyyətdən razıyam», – deyə mütəxəssis bildirib.

«Paide»nin baş məşqçisi Tarmo Kink komandasının növbəti mərhələdəki rəqibi olan «Zirə» ilə bağlı iddialı mesajlar verib. Rəqib komandanın heyət dəyərinin estoniyalıların heyətindən altı dəfə yüksək olması faktını şərh edən mütəxəssis, statistik göstəricilərə skeptik yanaşdığını vurğulayıb: «Bu rəqəmlər mənim üçün heç bir məna kəsb etmir. Futbol rəqəmlərlə oynanılmır. Əgər onlar bizdən altı dəfə çox xal toplamış olsaydılar, o zaman başqa cür danışardıq. Meydana çıxacağıq və hər şeyi yaşıl meydan göstərəcək».

Bakı səfəri öncəsi təqvim üstünlüyünə də toxunan estoniyalı çalışdırıcı, ilk oyunun öz meydanlarında keçirilməsini müsbət amil kimi dəyərləndirib. Kink bunun komandaya uzun yol yorğunluğu olmadan, doğma şəraitdə sakit şəkildə hazırlıq keçmək imkanı verəcəyini qeyd edib. «Paide» ikinci təsnifat mərhələsində «Zirə» ilə qarşılaşmağa hazırlaşır. Kink rəqib haqqında məlumatlarının az olduğunu etiraf etsə də, Azərbaycan çempionatının güclü və maddi resurslarla təmin olunmuş liqa olduğunu vurğulayıb.