“Mançester Siti”nin ulduz hücumçusu Erlinq Haaland artıq o qədər böyük şöhrət qazanıb ki, doğma vətəni Norveçə xüsusi turist axını cəlb edir. Yay mövsümündə futbolçunun böyüyüb başa çatdığı Brüne şəhərində azarkeşlər üçün “Haaland safariləri” təşkil olunur.

“Mançester Siti”də qolları sıralayan 26 yaşlı hücumçu peşəkar karyerasına məhz Norveçin cənub-qərbindəki kiçik Brüne qəsəbəsinin eyniadlı “Brüne FK” klubunda başlayıb. Turnirlərdən sonra Haalandın populyarlığının pik həddə çatmasını fürsət bilən klub rəhbərliyi onun uşaqlıq illərini maraqla qarşılayan turistlər üçün bələdçili turlar təşkil edir.

“Brüne FK”nın marketinq direktoru Byorn Haqerup Roken NRK telekanalına müsahibəsində belə deyib: “Dünənə qədər Erlinqə maraq böyük idisə, böyük turnirlərdən sonra o, tam mənada dünya ulduzuna çevrildi. Onun ətrafında yaranan bu ajiotajın daha da sürətləndiyini hiss edirik. Düşünürəm ki, bu, hem Brüne, həm də Haalandın özü üçün çox faydalıdır”.

2024-cü ildən start götürən bu layihə son illərdə daha da genişləndirilib. Böyük Britaniyadan gələn kruiz gəmilərinin Brüneyə yan alması da klubun işini asanlaşdırır – axı ingilis turistlər arasında futbola maraq daha böyükdür.

Ötən ildən bəri turun iştirakçı sayı iki dəfə artaraq 600 nəfərə çatıb. Təxminən 65 avro dəyərində olan bu turun illik gəlirinin 17 000 avrodan 34 000 avroya yüksələcəyi gözlənilir.

“Brüne FK” və yerli otelin birgə əməkdaşlığı çərçivəsində təşkil olunan tura klubun stadionu, örtülü futbol arenası və yerli təamların, o cümlədən Haalandın xüsusi brend dondurmasının dadına baxmaq imkanı yaradan mağazalara səfərlər daxildir.

Roken əlavə edib: “Turlar üçün yaxşı təməlimiz və könüllülərimiz var, lakin Brünedə turizmi həqiqətən canlandırmaq üçün güclərimizi birləşdirməliyik. Bu, hələ başlanğıcdır.”

Qeyd edək ki, Erlinq Haaland avqustun 23-də “Mançester Siti”nin heyətində “Bornmut”a qarşı keçiriləcək matçla Premyer Liqaya qayıdacaq.