Premyer Liqanın 28-ci turu çərçivəsində keçirilən “Zirə” – “Neftçi” matçından (1:1) sonra yaranan gərginlik səngimək bilmir. AFFA İntizam Komitəsinin (İK) çıxardığı ağır qərarlara baxmayaraq, paytaxt təmsilçisi rəsmi instansiyalara müraciət etməkdən imtina edib.

“Ağ-qaralar” İntizam Komitəsinin qərarlarından, xüsusən də azarkeşlərlə bağlı tətbiq edilən sanksiyalardan ciddi narazıdır. Klub rəhbərliyi hesab edir ki, “Zirə”nin qaydalar çərçivəsində vurulmayan qolunun qeydə alınması tribunada emosiyaların pik həddə çatmasına səbəb olub. Hakimlərin kobud səhvi fonunda yaranan bu gərginliyə görə “Neftçi” tərəfi daha mülayim və anlayışlı yanaşma gözləsə də, İK azarkeşlərin təhqiramiz ifadələrinə görə kluba güzəştə getməyib.

Maraqlı məqamlardan biri də məşqçilər korpusunun cəzalandırılması ilə bağlıdır. Belə ki, klub rəhbərliyi Yuri Vernidub, Dmitro Kara-Mustafa və Breno Almeydanın qırmızı vərəqə aldıqları üçün 3-4 oyunluq kənarlaşdırılacağından ehtiyat edirdi. Lakin cəzaların cəmi 1 oyunla məhdudlaşması “Neftçi” düşərgəsində müsbət qarşılanıb. Klub daxilində hesab edirlər ki, hakimlərin və rəsmi qurumların üzərində qurulan təzyiq öz bəhrəsini verib və daha ağır sanksiyaların qarşısını alıb.

Xatırladaq ki, sözügedən qarşılaşmanın yekununda AFFA İntizam Komitəsi müxtəlif qayda pozuntularına görə “Neftçi” klubunu ümumilikdə 26 200 manat məbləğində cərimələyib. Klub bu məbləği ödəməli olsa da, apellyasiya şikayəti verərək məsələni daha da uzatmamaq qərarına gəlib.