Hər iki komanda mövsümün gedişində məşqçi dəyişikliyi etmiş, mövsümün ikinci yarısına böyük ümidlərlə başlamışdı. Turnir cədvəli baxımından isə “Araz-Naxçıvan”ın vəziyyət nisbətən yaxşı idi. Lakin bu oyunun ilk yarısı göstərdi ki, naxçıvanlıların işi heç də asan olmayacaq. Açıq-aşkar üstün oynayan “Neftçi” çətinlik çəkmədən iki qol vurdu. Meydan sahibləri isə demək olar heç nə ilə yadda qalmadı. Komandada nə istək, nə aqressivlik, nə də oyunu xilas edə biləcək taktiki düşüncə vardı. Andrey Demçenkonun naxçıvanlıların oyununa hansı yenilikləri gətirdiyini söyləmək çətin idi. Ukraynalı məşqçi özü də deyəsən ilk yarıda bu suala cavab axatarırdı. Hər halda onun qayğılı, amma gedişatdan heç nə anlamayan mimikası bunu deməyə əsas verirdi.

İkinci hissədə meydan sahibləri daha canlı və hərəkətli oynadı və nəticədə daha şən oyun gördük. “Araz-Naxçıvan”ın heyətində xüsusilə sonradan meydana çıxan Felipe Santos canlanma yaratmışdı. Məhz Felipe komandasının yaradıcı oynamasında, topu özündə saxlamasında əsas rol oynayırdı. Lakin Felipenin hərəkətliliyi vəziyyəti dəyişmək üçün kifayət etmədi. Əvəzində sonradan meydana çıxan Alessio Kurçinin ustalığı həlledici oldu. Kurçi cərimə meydanı kənarından ustalıqla topu uzaq küncə fırlatdı.

Bu oyunda “Neftçi”nin qələbə qazanmasından çox “Araz-Naxçıvan”ın uduzduğunu söyləmək daha doğru olardı. Hətta ağır, yöndəmsiz Abubakar da yeriyə-yeriyə “Araz-Naxçıvan”a qol vurdu. Belə bir oyunla Yuri Vernidubun işini və komandanın oyununu saf-çürük etmək çətindir. Amma naxçıvanlıların bu gedişlə uğursuz mövsüm yaşayacağı istisna deyil.

“Araz-Naxçıvan” – “Neftçi” 0:4
Qollar: İqor Ribeyro, 4 (0:1). Bassala Sambu, 40 (0:2). Allesio Kurçi, 84 (0:3). Venssn Abubakar, 90+2 (0:2).