“Real”ın baş məşqçisi Joze Mourinyo komandanın yeni transferi Bernardo Silvanın debütündən sonra onun fiziki forması və taktikadakı rolu barədə fikirlərini bölüşüb.

13 illik fasilədən sonra Madrid klubuna qayıdan portuqaliyalı mütəxəssis yeni mövsüm öncəsi heyəti gücləndirmək üçün ilk növbədə “Mançester Siti”dən həmyerlisi Bernardo Silvanı transfer edib. “Barselona” və “Atletiko” kimi nəhənglər də təcrübəli yarımmüdafiəçi üçün mübarizə aparsa da, “Kral klubu” bu yarışdan qalib ayrılıb.

Mundialdan sonra qısa məzuniyyətə yollanan Silva şənbə günü “Ferentsvaroş”a qarşı keçirilən yoxlama matçında meydana çıxsa da, onun fiziki durumu baş məşqçini razı salmayıb.

Mourinyo “Daily Mail” nəşrinə açıqlamasında yeni transferinin mövsümöncəsi forması ilə bağlı narazılığını gizlətməyib: “Bernardo Silva? O, bizim üçün çox vacib oyunçudur. Amma yazıq uşaq, tətilə çıxanda futbolu unudur və ümumiyyətlə məşq etmir. Məhz buna görə də mövsümöncəsi hazırlığa xeyli zəif fiziki formada qayıtdı və indi bunu qaydaya salmalıdır”.

Bununla belə, “Real”ın 2:1 hesablı qələbəsi ilə başa çatan matçdan sonra təcrübəli mütəxəssis futbolçunun keyfiyyətlərini də yüksək qiymətləndirib: “Bernardo fantastik oyunçudur, istər dayaqlıq zonasında, istərsə də mərkəzdə – «altılıq» və ya «səkkizlik» mövqeyində oynasın, hücum quruculuğu mərhələsində bizə çox kömək edir. Oyun gedişində onun fiziki gücünün çatışmadığını hiss etdim, bu səbəbdən onu «onluq» mövqeyinə keçirdim. O, orada da əla çıxış edir. Ümumiyyətlə, Bernardodan üç-dörd müxtəlif mövqedə istifadə etmək mümkündür”.

Qeyd edək ki, “Kral klubu” mövsümöncəsi hazırlıq çərçivəsində artıq dörd yoxlama oyunu keçirib. Madridlilər La Liqada mövsümə avqustun 22-də səfərdə “Espanol”a qarşı matçla start verməzdən əvvəl daha iki yoxlama görüşündə – “Deportivo” və “Şalke”yə qarşı mübarizə aparacaqlar.