Kamandan oxatma üzrə millinin Türkiyənin Antalya şəhərində keçiriləcək açıq havada Avropa çempionatı üçün heyəti bəlli olub.
Azərbaycan Kamandan Oxatma Federasiyasından verilən məlumata görə, mayın 18–24-də təşkil olunacaq mötəbər yarışda ölkəmizin şərəfini 6 idmançı qoruyacaq. Yarışda ölkəmizi Yaylagül Ramazanova, Məhəmmədəli Əliyev, Fatimə Hüseynli, Lalə Əbdürəhmanova, Sərdar Vəliyev və Nurlan Rəhimli təmsil edəcəklər.
Qitə birinciliyinin proqramına əsasən, oxatanlarımız fərdi, komanda və qarışıq (miks) növlərdə hədəf qarşısına keçəcəklər. Millimizin çempionata maksimum hazırlıqlı yollanması üçün genişmiqyaslı təlim-məşq toplanışları təşkil edilib.
Hazırlıq planının ilk mərhələsində Belarus seçməsinin üzvləri ilə Quba Olimpiya İdman Kompleksində birgə məşqlər keçən idmançılarımız, mayın 3-dən etibarən toplanışın yekun hissəsini Antalyada – bilavasitə yarışın baş tutacağı məkanda davam etdirirlər. Bu da oxatanlarımızın yerli şəraitə və iqlimə adaptasiya olması baxımından böyük üstünlük yaradır.