Bakıda keçirilən qadınlar arasında Avropa çempionatının C qrupunda həyəcan dolu son qarşılaşma geridə qalıb. Faiq Qarayevin rəhbərlik etdiyi milli komandamız Gimnastika Arenasında qitənin güclü komandalarından olan Niderland yığması ilə üz-üzə gəlib.

Gərgin və dinamik başlayan qarşılaşmada voleybolçularımız tribunalardakı böyük azarkeş dəstəyindən maksimum yararlanaraq oyuna fantastik start veriblər. İlk seti 25:15 hesabı ilə inamlı qələbə ilə başa vuran millimiz doğma divarlar arasında üstünlüyünü nümayiş etdirsə də, təcrübəli Niderland kollektivi tezliklə toparlanmağı bacarıb. İkinci setdə 25:16 hesabı ilə üstünlük qazanan qonaqlar hesabı bərabərləşdiriblər.

Hər xal uğrunda gərgin mübarizə şəraitində keçən növbəti setlərdə isə Niderland voleybolçuları daha az texniki səhvə yol verərək üstünlük əldə ediblər. Qonaqlar 25:22 və 25:19 hesablı set qələbələri sayəsində matçdan 3:1 hesablı qalib ayrılıblar.

Məğlubiyyətə baxmayaraq, milli komandamız turnirdə qarşısına qoyulan əsas hədəfə çatıb. C qrupunda keçirdiyi oyunlarda 8 xal toplayan voleybolçularımız yekun sıralamada 3-cü pilləni tutaraq Avropa çempionatının 1/8 final mərhələsinə vəsiqə qazanıblar. Belçika 13 xalla qrup lideri olub, Niderland isə 12 xalla ikinci yeri tutub. Rumıniya, Portuqaliya və İspaniyanı geridə qoyan millimizin pley-offdakı rəqibi də müəyyənləşib.

A qrupunda Polşaya 2:3 hesabı ilə uduzaraq ikinci pilləni tutan Türkiyə yığması növbəti mərhələdə komandamızın rəqibi olacaq. Prinsipial xarakter daşıyan qarşılaşma avqustun 31-də İstanbulda keçiriləcək.

Görüşdən sonra təəssüratlarını bölüşən baş məşqçi Faiq Qarayev komandanın mübarizə əzmini yüksək qiymətləndirib. Təcrübəli mütəxəssis Niderland kimi güclü rəqibə qarşı qələbə şanslarının olduğunu, lakin həlledici məqamlarda yol verilən texniki səhvlərin və bəzi oyunçuların beynəlxalq təcrübəsinin azlığının nəticəyə təsir etdiyini bildirib.

“Buna baxmayaraq, qızlara təşəkkür edirəm. Əsas məqsədimiz qrupdan çıxmaq idi və biz buna nail olduq”, – deyə Qarayev vurğulayıb.

Millinin aparıcı üzvlərindən Yelizaveta Ruban da azarkeşlərin dəstəyini xüsusi qeyd edib. O, komandanın Avropanın aparıcı yığmalarından biri ilə bərabər səviyyədə mübarizə apardığını bildirib.

Rubanın sözlərinə görə, əvvəlki Avropa çempionatı ilə müqayisədə bu dəfə qrup mərhələsini adlamaq komanda üçün mühüm uğurdur. Milli komanda artıq diqqətini İstanbulda keçiriləcək Türkiyə ilə çətin 1/8 final qarşılaşmasına yönəldib.