Hollivud ulduzu Mett Deymon, Kristofer Nolanın yeni filmi “Odisseya”nın (The Odyssey) təqdimat kampaniyası çərçivəsində “Telemundo” telekanalına maraqlı müsahibə verib. 55 yaşlı “Oskar” mükafatçısı evində Argentina millisinin kapitanı Lionel Messiyə xüsusi rəğbət bəslənildiyini etiraf edib.
Aparıcının “Evdə Messinin şəkli olan Argentina bayrağı varmı?” sualına aktyor gülümsəyərək belə cavab verib: “Əlbəttə var. Evimizdə Messi məndən daha vacib adamdır… Həm də qat-qat vacib”.
Deymonun Argentina futboluna sevgisi təsadüfi deyil. Aktyorun həyat yoldaşı, prodüser Lusiana Barroso Argentinanın Salta şəhərindəndir. Məhz onun ailəsi sayəsində futbola bağlanan Deymon, vaxtilə Buenos-Ayresdə “Boka Xuniors”un oyunlarını stadiondan izlədiyini və oradakı çılğın atmosferə heyran qaldığını bildirib. 2005-ci ildən evli olan cütlüyün üç övladı var.
Aktyor dünya çempionatında Argentinanı dəstəklədiyini, lakin “Odisseya” filmindəki tərəf-müqabili və yaxın dostu Con Leguizamoya görə Kolumbiya millisinə də azarkeşlik edəcəyini sözlərinə əlavə edib.