Dünya çempionatında möhtəşəm oyun nümayiş etdirən Argentina millisi ardıcıl qələbələrlə azarkeşlərini sevindirməkdə davam edir. Turnirə sürətli başlayan cənubi amerikalılar Əlcəzairi 3:0, Avstriyanı isə 2:0 hesabı ilə məğlub ediblər. Komandanın vurduğu bütün qollara isə kapitan Leo Messi imza atıb. Bu performansla ulduz futbolçu dünya çempionatları tarixinin ən məhsuldar oyunçusu rekordunu yeniləyərək turnirdəki ümumi qol sayını 18-ə çatdırıb.
Argentinalı futbolçuların ailələri də bu tarixi anları stadiondan canlı izləyərək komandaya dəstək olurlar. Messinin xanımı Antonela Rokkuzzo övladları ilə birlikdə tribunadan paylaşdığı fotolarla diqqət mərkəzinə düşüb. O, “Instagram” hesabında həyat yoldaşına müraciət edərək bu sözləri yazıb: “Sənin dönə-dönə tarix yazmağını izləmək necə də böyük bir xoşbəxtlikdir! Səni sevirəm”.
Qısa müddətdə 4,2 milyondan çox bəyənmə toplayan bu paylaşıma Leo Messi də şərh bölməsində ürək emojiləri ilə “Səni sevirəm” yazaraq qarşılıq verib.
Argentina yığması növbəti matçını iyunun 28-də İordaniya komandasına qarşı keçirəcək.