Argentina Futbol Assosiasiyasının (AFA) prezidenti Klaudio Tapia “TyC Sports” kanalına müsahibəsində həm Leo Messinin, həm də baş məşqçi Lionel Skaloninin milli komandadakı gələcəyi ilə bağlı dolaşan şayiələrə son qoyub.

DÇ-2026-nın başa çatmasından artıq bir müddət keçib. Bildiyiniz kimi, Argentina millisi finalda İspaniyaya 1:0 hesabı ilə məğlub olaraq çempionluq titulunu qoruya bilmədi.  Nəhayət, AFA prezidenti bu məsələyə rəsmi aydınlıq gətirib.

Tapia, ulduz futbolçunun gələcək taleyinin tamamilə öz əllərində olduğunu və ona hər zaman hörmətlə yanaşdıqlarını vurğulayıb: “Onun Amerika Kuboku-2028-də iştirak edib-etməyəcəyi öz qərarından aslıdır. O, özünü buna hazır hiss etməlidir. 2022-ci ildə də biz onun 2026-cı il Dünya Çempionatında oynayıb-oynamayacağını bilmirdik. Biz onunla fəxr etməliyik. Ümid edirəm ki, o, futboldan zövq almağa davam edəcək və özü üçün ən doğru bildiyi qərarı verəcək.”

Məsələ yalnız Messi ilə məhdudlaşmır. Dünya Çempionatının finalından sonra baş məşqçi Lionel Skaloni yalnız dekabr ayına qədər postunda qalacağını və bundan sonra milli komandadakı fəaliyyətini böyük ehtimalla yekunlaşdıracağını açıqlamışdı. Lakin görünən odur ki, ölkə futbolunun rəhbərliyi bu ayrılığa qətiyyən razı deyil.

Tapia, gələcək planlarında başqa bir məşqçiyə yer olmadığını qəti şəkildə ifadə edib: “Mənim A planım, B planım və C planım – məhz Skalonidir. Mən onun işinə davam etməsini istəyirəm. Bunu hamımız istəyirik. Düşünməsi və qərar qəbul etməsi üçün ona vaxt verməliyəm. Təbii ki, əgər o, motivasiya çatışmazlığı hiss edərsə və ya uğura gedən yolu görməzsə, onu zorla saxlaya bilmərəm”. Bütün diqqətlər indi həm Messinin, həm də Skaloninin verəcəyi yekun qərarlara yönəlib. Hər iki önəmli fiqurun Argentina futbolundakı gələcəyi yaxın aylarda dəqiqləşəcək.