“Real Madrid”in ulduz hücumçusu Kilian Mbappe karyerasındakı çətin dönəmlər, müdafiə planındakı çatışmazlıqları və PSJ-dən ayrılma səbəbləri barədə səmimi etiraflar edib. The Bridge podkastına qonaq olan fransalı forvard, həm klub, həm də milli komanda səviyyəsində yaşadığı psixoloji baryerlərdən söz açıb.
Mbappe oyununa ünvanlanan əsas tənqidlərdən biri – müdafiə fazasında passiv qalması ilə bağlı səslənən fikirlərlə razılaşıb. O, bu yanaşmanın komanda balansına mənfi təsir edə biləcəyini etiraf edib: “Digər oyunçularla müqayisədə müdafiədə daha az iştirak edirəm və bu, bəzən problem yaradır. Lakin müşahidə edirəm ki, mən geriyə köməyə gələndə bu, bütün komandaya sirayət edir. Madriddə mən presinqə başlayan kimi hamı buna qoşulur. Bu mövzuda tənqid olunmaq məni narahat etmir, çünki bunu konstruktiv yanaşma kimi qəbul edirəm”.
2024-cü ilin yayında Paris klubundan ayrılan Mbappe, keçmiş komandasının ondan dərhal sonra (2025-ci ildə) Çempionlar Liqasını qazanmasına da toxunub. O, gedişini bir kitabın sona çatması ilə müqayisə edib: “Əgər daha tez getmiş olsaydım və onlar qalib gəlsəydi, çox heyfslənərdim. Amma mən Parisdəki ‘kitabımın’ sonuna çatmışdım. yeddi il ərzində əlimdən gələni etdim. Artıq orada qalmağın mənası yox idi”.
2023/24 mövsümündə Dortmund “Borussiya”sına uduzduqları yarımfinalı xatırlayan ulduz, o matçın nəticəsini şanssızlıqla əlaqələndirib: “Həmin qarşılaşmanı 500 dəfə yenidən oynasaydıq, 499-da biz qalib gələrdik. Amma top qapıya getmədi“.
Mbappe karyerasının ən ağır dönəminin “Avro-2020″dəki uğursuzluq və ondan sonra gələn irqçi hücumlar olduğunu bildirib. İsveçrə ilə matçda qaçırılan penaltidən sonra forvard ağır təhqirlərə məruz qalıb: “Məni “meymun” adlandırmağa başladılar. Düşünürdüm ki, mən qol vurmayanda məni dibə çəkən insanlar üçün niyə oynamalıyam? Bu, çox amansız idi. Özümü “canlı ölü” kimi hiss edirdim”.Mbappe hətta həmin dövrdə Fransa Futbol Federasiyasının o zamankı prezidenti Noel Le Qre ilə görüşərək millidən getmək istədiyini deyib: “Ona dedim ki, daha oynamayacağam. Amma Le Qre buna icazə vermədi və bu fikri unutmalı olduğumu söylədi”.