Xosep Qvardiolanın gedişindən sonra yeni dövrə qədəm qoyan “Mançester Siti” ilk rəsmi matçında sarsıdıcı məğlubiyyətlə üzləşib. “Şəhərlilər” İngiltərə Superkuboku (Community Shield) uğrunda görüşdə “Arsenal”a 0:3 hesabı ilə boyun əyiblər. Entso Mareskanın baş məşqçi kimi debütü həm erkən buraxılan qol, həm də qapıçı Canluici Donnarummanın kobud səhvləri ilə yadda qalıb.

“Mançester Siti” üçün klub tarixindəki yeni səhifə heç də xoş başlamayıb. Yay fasiləsində düz 10 illik fəaliyyətindən sonra postunu tərk edən Qvardiola ilə yanaşı, illərdir komandanın onurğa sütununu təşkil edən Bernardo Silva və Con Stouns kimi təcrübəli oyunçular da klubdan ayrılıblar. Əvəzində 135 milyon avro qarşılığında transfer edilən İngiltərə millisinin üzvü Elliot Anderson komandaya qoşulub və “Arsenal”a qarşı dərhal ilk onbirlikdə yer alıb.

“Arsenal” isə heyətində köklü dəyişikliklərə ehtiyac duymayıb. Buna baxmayaraq, “topçular”ın 87,5 milyon avroya rənglərinə bağladığı braziliyalı yarımmüdafiəçi Bruno Gimarayeş və yunanıstanlı vinger Xristos Tziolis komandanın heyətində rəsmi debütlərini rəsmiləşdiriblər.

Entso Mareskanın debütü sözün əsl mənasında şokla başlayıb. “Siti” artıq 23-cü saniyədə topu öz qapısında görüb. Maylz Lüis-Skellinin ötürməsindən sonra Rikardo Kalafiori qapıçı Canluici Donnarummanı məyus edib. Qeyd edək ki, bu, 1968-ci ildən bəri İngiltərə Superkuboku tarixində birinci dəqiqədə vurulan ilk qol kimi tarixə düşüb.

Görüşün yarım saatı tamam olmamış fərq iki topa çatıb. Belçika çempionatında məhsuldar ötürmələri ilə diqqət çəkən yeni transfer Tziolis İngiltərədə də eyni ampluada çıxış edəcəyini göstərib. Onun asmasından sonra Kay Haverts cərimə meydançasında başla zərbə endirib. Bu epizodda almaniyalı hücumçunun yaxın məsafədən zərbəsini Donnarumma xilas edə biləcək səviyyədə olsa da, italiyalı qolkiperin son dərəcə uğursuz və inamsız müdaxiləsi topun tora daxil olması ilə nəticələnib – 2:0.

Buraxılan qollarda birbaşa günahkar olan qolkiper ikinci hissənin əvvəlində də komandasını çətin vəziyyətdə qoyub. 47-ci dəqiqədə Martin Odeqorla təkbətək qalan Donnarumma olduqca tez təslim olub və norveçli ulduz fərqi üçə yüksəldərək matçın yekun hesabını müəyyənləşdirib.