Barselona” gənc ulduzu Lamin Yamalın çempionluq paradında Fələstin bayrağı açmasına rəsmi reaksiya verib. Klub rəhbərliyi addımın yaratdığı böyük rezonansdan, xüsusilə İsrail hökuməti və israilli azarkeşlərin sərt tənqidlərindən xəbərdar olduğunu gizlətməyib.
Şərh vermək səlahiyyəti olmadığı üçün adının açıqlanmasını istəməyən klub rəsmisi “The Athletic”ə müsahibəsində yaranmış həssaslığı başa düşdüklərini qeyd edib. O, gənc ulduzun hərəkətində siyasi motiv axtarmağın yanlış olduğunu diqqətə çatdırıb: “Lamin klub adından çıxış etməyib və heç bir siyasi bəyanat verməyib. Onun məqsədi hansısa ölkəyə, xalqa və ya icmaya mesaj ötürmək olmayıb”.
Futbolçunun yaxın çevrəsindən sızan məlumatlara görə, gənc ulduzun bu addımı tamamilə anidən, emosiyaların təsiri altında atılıb. Fələstin-İsrail münaqişəsində dinc sakinlərin çəkdiyi acıları ürəkağrısı ilə izləyən 18 yaşlı vunderkindin bu mövzuda olduqca həssas olduğu və yaşanan dramı dərindən yaşadığı bildirilir.