Futbol üzrə ölkə kubokunda qalibin adına aydınlıq gələcək “Sabah” – “Zirə” final qarşılaşmasının biletləri artıq satışa çıxarılıb. Peşəkar Futbol Liqasından (PFL) verilən məlumata görə, azarkeşlər biletləri bu gündən etibarən “iticket.az” saytı vasitəsilə onlayn qaydada əldə edə bilərlər.
Azarkeşlər həlledici qarşılaşmanı stadiondan izləmək üçün biletləri müxtəlif qiymət kateqoriyalarına uyğun əldə edə bilərlər. Sektorlardan asılı olaraq qiymətlər 5-30 manat aralığında dəyişir. Daha yüksək konfort sevənlər üçün isə 50 manatlıq “VIP Gold” biletləri təklif olunur.
Xatırladaq ki, həlledici final matçı mayın 13-də “Palms Sports Arena”da baş tutacaq. Görüşün start fiti saat 20:00-da səslənəcək.