Bu axşam UEFA Konfrans Liqasının ən güclü dörd komandası finala gedən yolda ilk ciddi sınağına çıxacaq. İspaniya təmsilçisi “Rayo Valekano” doğma divarlar arasında Fransanın “Strasbur” komandasını qəbul edəcək. Madrid klubunun coşğulu azarkeşləri önündə hücum futbolu nümayiş etdirəcəyi gözlənilir. Lakin intizamlı müdafiəsi və sürətli əks-hücumları ilə seçilən “Strasbur” ilk oyundan sərfəli nəticə qazanmaq niyyətindədir.
Gecənin ən çox gözlənilən qarşılaşması heç şübhəsiz ki, Arda Turanın rəhbərliyi ilə uğurlu yol qət edən “Şaxtyor”un İngiltərə Premyer Liqasının iddialı təmsilçisi ‘Kristal Pelas’a qarşı keçirəcəyi oyun olacaq. İngiltərə təmsilçisi səfər oyunu üçün artıq hazırlıqlarını tamamlayıb. Bu duel həm də iki fərqli futbol məktəbinin – Ukrayna əzmkarlığının və İngiltərə atletizminin toqquşması olacaq.
Yarımfinalın ilk oyunları adətən ehtiyatlı başlasa da, bu cütlüklərdə hər bir qolun çəkisi qızıl dəyərindədir. Ev sahibi üstünlüyündən istifadə etmək istəyən “Rayo Valekano” və Premyer Liqa təcrübəsinə güvənən “Kristal Pelas” kağız üzərində bir addım öndə görünsə də, Konfrans Liqası hər zaman sürprizləri sevib.
Konfrans Liqası, 1/2 final (ilk oyunlar)
30 aprel 23:00 Rayo Valekano (İspaniya) – Strasbur (Fransa)
30 aprel 23:00 Şaxtyor – Kristal Pelas
TV: CBC Sport, TRT 1