Kabo-Verde yığmasının kapitanı Rayan Mendesə qarşı Yeni Zelandiyada təcavüz ittihamı ilə cinayət işi açılıb. Hadisənin bu ilin mart ayında baş verdiyi bildirilsə də, “New Zealand Herald” nəşri futbolçunun kimliyini yalnız indi təsdiqləyə bilib. Jurnalistlər bu qənaətə çoxsaylı mənbələr və rəsmi sənədlər əsasında gəliblər.

Yığma tarixinin ən yaxşı bombardiri olan Mendes ilin əvvəlində keçirilən “FIFA Series” turnirində çalışan braziliyalı qadına təcavüz etməkdə günahlandırılır. Medianın yaydığı məlumata görə, zərərçəkən qadın Mendesin zorla onun otağına daxil olaraq təcavüz etdiyini bildirib. Artıq sosial şəbəkələrdə və mətbuatda qadının xəsarətlərini əks etdirən fotolar da yayılıb. Hazırda araşdırma davam edir və futbolçuya qarşı hələlik rəsmi ittiham irəli sürülməyib.

Qeyd edək ki, “The Athletic” nəşri hələ may ayında Yeni Zelandiya rəsmilərinin Kabo-Verde millisinin adı açıqlanmayan bir oyunçusu ilə bağlı araşdırma apardığını yazmışdı. O vaxt yerli polis, FİFA və Kabo-Verde Futbol Federasiyası məsələ ilə bağlı şərh verməkdən imtina etmişdi.

Xatırladaq ki, sözügedən “FIFA Series” turniri çərçivəsində Kabo-Verde martın 27-də Çili, üç gün sonra isə Yeni Zelandiya ilə qarşılaşıb.

Bütün bu iddialara baxmayaraq, 36 yaşlı Mendes hazırda dünya çempionatında millinin heyətində çıxışını davam etdirir. O, qrup mərhələsinin hər üç oyununda iştirak edərək ümumilikdə 251 dəqiqə meydanda olub. İspaniya, Uruqvay və Səudiyyə Ərəbistanı ilə heç-heçə edən Kabo-Verde pley-offa yüksəlməklə dünya çempionatları tarixində bu mərhələyə adlayan ən az əhalisi olan ölkə kimi tarixə düşüb. Mendes növbəti matçına iyulun 3-də Mayamidə – Argentinaya qarşı 1/16 final oyununda çıxa bilər.

Əlavə edək ki, son dövrlər analoji ittihamlarla Qana millisinin üzvü Tomas Parti (məhz bu səbəbdən Kanadaya viza ala bilməmişdi) və Mərakeş yığmasının kapitanı Əşrəf Hakimi də üzləşiblər. Lakin hər iki futbolçu günahsız olduğunu bəyan edib.