Mundialın qrup mərhələsi üçün Kanzas-Sitiyə gələn İngiltərə millisi ABŞ-da ard-arda xoşagəlməz hadisələrlə üzləşir. Tomas Tuxelin komandası hələ düşərgəyə çatmamışdan başlayan “qara zolaq” artaraq davam edir.
Hələ iyunun 8-də ingilislərin məskunlaşacağı otelin yaxınlığında 9 nəfərin yaralanması ilə nəticələnən atışma baş vermişdi. Lakin “Üç şir”in xoşagəlməz macəraları bununla bitmədi.
Komandanın düşərgəsində yaşanan uğursuzluqlar zənciri fərqli xarakterli hadisələrlə davam edib. Hər şey millinin aşpazının baqajında polad mətbəx bıçaqları aşkarlandığı üçün qatara buraxılmaması ilə başlayıb. Bu bənzərsiz “aşpaz böhranı”nın ardınca təbii maneələr özünü göstərib. Kosta-Rika ilə planlaşdırılan yoldaşlıq görüşü stadiondakı güclü leysan üzündən gecikmə ilə başlayıb. İngilislərin problemlərinin kulminasiya nöqtəsi isə seçmənin idman geyimlərini daşıyan furqonun qarət edilməsi olub. Xoşbəxtlikdən, oğurlanan əşyaların böyük hissəsini qısa zamanda tapıb komandaya qaytarmaq mümkün olub.
Şənbə günü şəhərə gələn komanda isti hava şəraitində açıq məşq keçib. Lakin axşam saatlarında bölgəyə xas kəskin hava dəyişikliyi baş verib. Sürəti saatda 130 km-ə çatan fırtına, ildırım çaxması və leysan şəhərdə həyəcan siqnallarının işə düşməsinə səbəb olub.
The Sun nəşrinin məlumatına görə, İngiltərə nümayəndə heyəti də daxil olmaqla, oteldəki bütün qonaqlara təhlükəsizlik xəbərdarlığı göndərilib. Otel rəhbərliyinin tövsiyəsi ilə komanda üzvləri dərhal birinci mərtəbənin mərkəzi holuna təxliyə edilib və fırtınanın keçməsini orada gözləyiblər. Hadisə zamanı xəsarət alan olmasa da, mundial ərəfəsində yaşanan bu gərgin anların Tuxelin yetirmələrinin əhval-ruhiyyəsinə mənfi təsir göstərdiyi şəksizdir.