Beynəlxalq Cüdo Federasiyası (IJF) dünya reytinq cədvəlini yeniləyib. Cari ilin göstəricilərinə əsasən, Azərbaycan cüdo məktəbinin nümayəndələri qlobal arenada öz mövqelərini qorumaqla yanaşı, liderlər qrupunda qərarlaşmağa davam edirlər.

Yeni reytinq siyahısında Azərbaycan millisinin heyətində ən yüksək pillələri Zelim Tskayev (81 kq) və ağırçəkili Uşanqi Kokauri (+100 kq) bölüşürlər. Hər iki idmançı 2-ci pillədə qərarlaşmaqla, dünya çempionatları və digər nüfuzlu “World Tour” turnirlərindəki uğurlu çıxışlarının nəticəsini reytinq xallarına çevirə biliblər.

Olimpiya çempionu Zelim Kotsoyev (100 kq) isə 4120 xalla 3-cü pillədə yer alaraq, öz çəki dərəcəsində dünyanın ən güclü üç cüdoçusu sırasındakı yerini möhkəmləndirib.

Cüdoçularımızın reytinq cədvəlindəki sıxlığı Azərbaycanın bu idman növündəki potensialından xəbər verir. Belə ki, Balabəy Ağayev (60 kq) 4-cü, Ruslan Paşayev (66 kq) və olimpiya çempionu Hidayət Heydərov (73 kq) isə 5-ci pillədə qərarlaşaraq ilk beşliyi tamamlayırlar.

İlk onluqdakı mövqeləri ilə diqqət çəkən digər təmsilçilərimizə gəldikdə, Əhməd Yusifov (60 kq) 6-cı, Murad Fətiyev (90 kq) isə 7-ci pillədə qərarlaşıb. Ömər Rəcəbli (81 kq) və Kənan Nəsibov (+100 kq) isə 10-cu pilləni tutmaqla ilk onluğu tamamlayan cüdoçularımız olublar.

Qadın cüdoçularımızın reytinqində liderliyi Könül Əliyeva (48 kq) əlində saxlayır. 1335 xalla 27-ci pillədə qərarlaşan idmançımız, qadınlar arasında Azərbaycanın ən yaxşı göstəricisinə imza atıb.