Dünya çempionatının final oyununu idarə etməyə namizədlər sayıln ingiltərəli referilər Maykl Oliver və Entoni Teylor, meydandakı fəaliyyətlərindən asılı olmayan səbəblərdən bu arzularından məhrum ola bilərlər. FİFA-nın təyinat prinsipləri bu iki hakimin taleyini birbaşa İngiltərə və Argentina millilərinin turnirdəki çıxışından asılı vəziyyətə salıb.
Bəs qaydalar nə deyir? Əgər İngiltərə yığması yarımfinala yüksəlsə, qaydalara əsasən, Oliver və Teylor öz ölkələrinin oyununa təyin edilə bilməzlər. Lakin ingilislər turnirdən kənarlaşsa belə, problem həll olunmur. Səbəb isə 1982-ci ildə Böyük Britaniya və Argentina arasında baş vermiş Folklend (Malvin) adaları müharibəsidir. Münaqişədən 44 il keçməsinə baxmayaraq, FİFA siyasi gərginlik və yarana biləcək şübhələri önləmək üçün Argentinanın oyunlarına ingilis hakimləri təyin etməkdən qaçır.
Bu, ilk belə hal deyil. DÇ-2022-də Entoni Teylor finalı idarə etməyə əsas namizəd olsa da, Argentinanın finala yüksəlməsi onun adının siyahıdan silinməsinə səbəb olmuşdu. FİFA mühüm oyunlara hakim təyin edərkən peşəkarlıqla yanaşı, geosiyasi amilləri də nəzərə alır. Beləliklə, Oliver və Teylorun finalı idarə etmək şansı təkcə öz performanslarından deyil, həm də İngiltərə və Argentinanın turnirdəki taleyindən asılıdır.