Fransada dəhşətli cinayət planının üstü açılıb. Ölkə mətbuatının, xüsusilə “Le Parisien” qəzetinin yazdığına görə, 18 yaşlı qruplaşma liderinə qarşı rəsmi ittiham irəli sürülüb.

“Klement L.” kimi tanınan gənc avqustun 21-də əlbir olaraq təşkil edilən soyğunçuluq və bir sıra ağır cinayətlərdə ittiham olunaraq həbs edilib. İstintaq onun başçılıq etdiyi dəstənin oğurluqlarla yanaşı, bir neçə adam oğurluğu planlaşdırdığını da müəyyənləşdirib.

Polisin əldə etdiyi məlumatlara görə, dəstə başçısının hədəf siyahısında varlı iş adamları, məşhur reperlər və tanınmış futbol ulduzu Kilian Mbappe də daxil olmaqla ümumilikdə 26 nəfər olub. Gənc cinayətkarın kimliyi ötən ilin aprelində Parisin qərbindəki Nöyi-sür-Sen ərazisində saat ustasına hücumdan sonra müəyyən edilib.

Təcridxanaya yerləşdirilən “Klement L.” barəsində sərt tədbir görülüb. Prokurorluq nümayəndəsinin sözlərinə görə, onun xaotik və cinayətkar həyat tərzini nəzərə alaraq, yeganə çıxış yolu məhz təkadamlıq kameradır.