Kabo-Verde ilə oyundakı gərginlikdən sonra Argentina millisi səhvlərindən nəticə çıxarmağı bacardı. Baş məşqçi Lionel Skaloni komandanın keçid fazalarındakı problemlərini həll etmək üçün Misir qarşılaşmasında ciddi taktiki dəyişikliklərə əl ataraq, faktiki olaraq DÇ-2022-dəki uğurlu modelə geri döndü. Zədədən sonra tədricən forma yığan Leandro Paredesin dayaq yarımmüdafiəçisi mövqeyinə qayıtması Aleksis Mak Allisterin hücuma daha yaxın oynamasına şərait yaratdı və Enzo Fernandezə sərbəstlik qazandırdı. Hücum xəttində isə start heyətində Lautaro Martinesi Xulian Alvares əvəzlədi. Mütəxəssis vurğuladı ki, taktikadan asılı olmayaraq, bu komandanın əsas gücü istənilən çətin vəziyyətdə xarakter nümayiş etdirmək və sınmamaqdır.
Atlantadakı qarşılaşma həm də Lionel Messi və Məhəmməd Salahın böyük dueli kimi anons edilmişdi. İntizama üstünlük verən Misirin baş məşqçisi Hossam Hassan gözlənilənin əksinə, cəsarətli oyun nümayiş etdirdi və afrikalılar Yasser İbrahimin baş zərbəsi ilə hesabı açdılar. Az sonra Nikolas Talyafikonun qazandığı penalti ilə Argentinanın bərabərlik şansı yaransa da, turnirdə antirekorda imza atan Lionel Messi qapıçı Şobeiri keçə bilmədi və DÇ karyerasında 4-cü penaltisini qaçırdı. Atasının yolunu davam etdirən gənc qapıçı Şobeir isə turnirdə ikinci penaltisini dəf edərək dünya çempionatları tarixinə düşdü. İlk hissədə Şobeirin seyvləri və Messinin cərimə zərbəsindən topun dirəyə dəyməsi Argentinanın qol vurmasına mane oldu.
İkinci yarıda Misir tam heyətlə müdafiəyə çəkilərək əks-hücum taktikasına keçdi. Zikonun vurduğu qol əvvəlcə qayda pozuntusuna görə ləğv edilsə də, az sonra Salah və Ziko kombinasiyası Misiri 2:0 önə keçirdi. Lisandro Martinesin müdafiədəki səhvləri Argentinanı çətin vəziyyətə salsa da, komanda “uğursuzlar kompleksini” geridə qoyduğunu sübut etdi. Pley-off mərhələlərində 14-cü oyununa çıxaraq Miroslav Klozenin rekordunu təkrarlayan Messi, matçın sonlarında əsl şou göstərdi. O, əvvəlcə Kristian Romeronun qolunda assistentlik etdi, ardınca isə özü hesabı bərabərləşdirdi. Bu qolla dahi onluq DÇ-1930-dan bəri Gilyermo Stabilenin bir turnirdə 8 qol vuran argentinalı rekordunu yenilədi. Matçın son saniyələrində isə Lautaro Martinesin ötürməsini başla qola çevirən Enzo Fernandez komandasına 3:2 hesablı möhtəşəm qələbə qazandırdı.
Dünya çempionatı, 1/8 final
Argentina – Misir 3:2
Qollar: Yasser İbrahim, 15 (0:1); Ziko, 67 (0:2); Kristian Romero, 79 (1:2); Lionel Messi, 83 (2:2); Enzo Fernandez, 90+2 (3:2).
Qaçırılan penalti: Lionel Messi, 21 (qapıçı)
Baş hakim: Fransua Letekye (Fransa).
Argentina: E. Martines, L. Martines, Romero (Otamendi, 90+5), Talyafiko (Qonsales, 66), Molina (Montiel, 73), Paredes, Mak Allister, Fernandez, de Paul (L. Martines, 66), Alvares (Medina, 90+5), Messi.
Misir: Şobeir, Yasser İbrahim, Rabia, Hafez, Hani, Laşin (Sayed, 90+5), Ateya, Aşur (Fati, 46), Hassan (Trezege, 73), Salah, Ziko (Marmuş, 80).
Stadion: “Mercedes-Benz Stadium” (Atlanta).