Dünya çempionatının 1/8 final mərhələsi çərçivəsində keçirilən və İngiltərənin 3:2 hesablı qələbəsi ilə başa çatan Meksika – İngiltərə qarşılaşmasının ikinci hissəsi gərgin hakim qərarları ilə yadda qalıb. Matçın baş hakimi Əlirza Fəğani ikinci hissədə baş verən üç kritik epizodda VAR otağının köməkliyi ilə tamamilə düzgün qərarlar qəbul edib.

Matçın 54-cü dəqiqəsində ingiltərəli müdafiəçi Carell Kuansa tullanaraq butsunun altı ilə Xesus Qalyardonun ayağına ciddi zərbə endirib. Videoassistentlər Nikolas Qalyo, Xuan Lara və Xuan Sotonun müdaxiləsindən sonra monitora yaxınlaşan Əlirza Fəğani, qayda pozuntusunu “ciddi oyun qaydası pozuntusu” kimi qiymətləndirərək Kuansaya birbaşa qırmızı vərəqə göstərib.

İndi hər kəsi bir məqam maraqlandırır: FİFA İntizam Komitəsi Kuansa ilə bağlı necə qərar verəcək? Əgər ABŞ millisinin hücumçusu Folarin Baloqunun analoji hadisəsindəki kimi şərti cəza tətbiq olunarsa, Kuansa dörddəbir finalda meydana çıxa biləcək. Əks halda İngiltərə ciddi itki ilə üzləşəcək.

Azlıqda qalan ingilislər 58-ci dəqiqədə penalti qazanmaq hüququ əldə ediblər. Meksikalıların qapıçısı David Ranxel yerdə uzanaraq topu uzaqlaşdırmağa çalışarkən Entoni Qordonu açıq şəkildə yıxıb. Hücumun gedişatında top Harri Keynin əlinə dəysə də, referi əlin təbii vəziyyətdə olduğunu əsas gətirərək oyunu davam etdirib və qayda pozuntusuna görə penalti nöqtəsini göstərib.

Matçın 67-ci dəqiqəsində isə hadisələr İngiltərənin əleyhinə cərəyan edib. Yenə VAR-ın müdaxiləsindən sonra monitor qarşısına keçən Fəğani, Harri Keynin cərimə meydançası daxilində Brayan Qutyerresin ayağına vurduğu zərbəni diqqətdən qaçırmayıb və İngiltərənin qapısına düzgün penalti qərarı verib.