ABŞ, Meksika və Kanadanın ev sahibliyi edəcəyi builki dünya çempionatında iştirak edən hər bir federasiya FIFA-dan minimum 12,5 milyon dollar vəsait əldə edəcək. Bu barədə qərar qurumun Kanadanın Vankuver şəhərində keçirilən konqresində qəbul olunub. Beləliklə, turnirin ümumi mükafat fondu 727 milyon dollardan 871 milyon dollara yüksəldilib.

Əvvəlki razılaşmalara əsasən, turnirə vəsiqə qazanan 48 komandanın hər biri kvalifikasiya üçün 9 milyon, hazırlıq prosesi üçün isə 1,5 milyon dollar almalı idi. Lakin FIFA Şurasının son qərarı ilə bu rəqəmlər müvafiq olaraq 10 milyon və 2,5 milyon dollara çatdırılıb.

Bundan əlavə, bütün iştirakçı komandalara səfər və digər işgüzar xərcləri qarşılamaq üçün ümumilikdə 16 milyon dollar ayrılacaq. Bu isə hər bir federasiyanın büdcəsinə əlavə 333 000 dollar daxil olması deməkdir.

FIFA prezidenti Canni İnfantino qurumun rəsmi bəyanatında bu artımın əhəmiyyətini vurğulayıb: “Fəxrlə qeyd edirik ki, FIFA hazırda öz tarixinin ən stabil maliyyə dövrünü yaşayır. Bu imkan verir ki, bütün üzv assosiasiyalarımıza görünməmiş dəstək göstərək. Bu qərar qurumun resurslarının birbaşa futbola reinvestisiya edilməsinin bariz nümunəsidir”.

Vankuver konqresində qəbul edilən tarixi qərarlar dünya çempionatının iştirakçıları üçün maliyyə mənzərəsini kökündən dəyişib. Belə ki, turnirin ümumi mükafat fondu əvvəlki proqnozları 15% üstələyərək rekord həddə çatıb. Bu artım təkcə ümumi büdcədə deyil, həm də turnirin həlledici mərhələlərində mübarizə aparacaq komandaların qazancında özünü qabarıq büruzə verir.

FIFA-nın təsdiqlədiyi yeni şkalaya əsasən, turnirin əsas intriqası olan final matçının qalibi fantastik məbləğə – 50 milyon dollara sahib çıxacaq. Finalda məğlub olan komanda isə təsəlli olaraq büdcəsini 33 milyon dollarla zənginləşdirəcək.

Mükafatlandırma təkcə finalçılarla məhdudlaşmır; turnirin “kiçik final”ında və yarımfinal mərhələsində mübarizə aparan kollektivlər üçün də ciddi məbləğlər nəzərdə tutulub. Belə ki, dünya üçüncüsü olan komanda 29 milyon dollar, dördüncü pillənin sahibi isə 27 milyon dollar qazanacaq.

Turnirin reytinq cədvəlinin aşağı pillələrinə doğru mükafat məbləği azalaraq davam edəcək. Qrup mərhələsində mübarizəni dayandıran (33-48-ci yerlər) komandalar üçün nəzərdə tutulan minimal məbləğ isə 10 milyon dollar təşkil edəcək.

Qeyd edək ki, mükafat fondundakı bu kəskin artım FIFA-nın dünya futboluna daha çox sərmayə yatırmaq və milli federasiyaların iqtisadi müstəqilliyini gücləndirmək strategiyasının tərkib hissəsidir.