FIFA daxili çempionat matçlarının ölkə hüdudlarından kənarda keçirilməsini tənzimləyən yeni qaydalar toplusunu təqdim etməyə hazırlaşır. Bu addım müasir futbolun tələblərinə və ulduz futbolçuların iştirakı ilə keçirilən oyunlara olan qlobal marağa cavab olaraq atılıb.

İndiyədək Avropanın nəhəng futbol ölkələri əsasən Superkubok matçlarını “ekzotik” ölkələrdə keçirməyə üstünlük verirdilər. Lakin tezliklə “El Klasiko” kimi böyük maraq kəsb edən La Liqa qarşılaşmalarının fərqli qitələrdə oynanılması real ola bilər. The Guardian nəşrinin yaydığı məlumata görə, FIFA-nın iki illik işçi qrupunun fəaliyyəti nəticəsində hazırlanan yeni şərtlər aşağıdakı kimidir:

Kvota sistemi. Hər liqa mövsüm ərzində yüksək divizionun yalnız bir oyununu xaricə köçürə bilər.

Ev sahibliyi limiti. Qəbul edən ölkəyə mövsüm ərzində maksimum beş belə matça ev sahibliyi etməyə icazə veriləcək.

Razılaşma mexanizmi. Matçın keçirilməsi üçün milli federasiyaların, konfederasiyaların, ev sahibi assosiasiyanın və birbaşa FIFA-nın rəsmi razılığı mütləqdir.

FIFA futbolçuların rifahına, yerli azarkeşlərin maraqlarına və ya daxili yarışların strukturuna mənfi təsir göstərə biləcək hər hansı təşəbbüsü bloklamaq hüququnu özündə saxlayır. Həmçinin, klublardan gəlirlərin ədalətli bölüşdürülməsi və səfər imkanlarından məhrum olan azarkeşlərə kompensasiya ödənilməsi barədə təminat tələb olunacaq.

Xatırladaq ki, ötən illərdə “Vilyarreal” – “Barselona” (Mayami) və “Milan” – “Komo” (Pert) matçlarının xaricdə keçirilməsi planlaşdırılsa da, UEFA və yerli hakimiyyət orqanlarının təzyiqi, habelə qaydalardakı boşluqlar səbəbindən bu layihələr baş tutmamışdı. La Liqa və A Seriyası yeni qaydaları dəstəkləyərək bu fürsətdən yararlanmağı planlaşdırsa da, İngiltərə Premyer Liqası klub sahiblərinin israrlarına rəğmən, bu təcrübədən imtina etdiyini artıq rəsmən bəyan edib.