“Landau Layons” basketbol klubunun baş məşqçisi Erhan Toker Çempionlar Liqasının püşkünün nəticələrini qiymətləndirib. Bakı klubunun çalışdırıcısı təsnifat mərhələsindəki rəqibləri və qarşıda duran hədəflər barədə danışıb.

Klubun rəsmi saytına açıqlama verən təcrübəli mütəxəssis, ilk növbədə, ölkə basketbolunun avrokuboklardakı təmsilçiliyinə diqqət çəkib və təsnifatdakı rəqibləri Latviyanın VEF komandası ilə gözlənilən qarşıdurmanı şərh edib: “Çox şadam ki, yeni avromövsümdə Azərbaycanı 4 klub təmsil edəcək. Bu münasibətlə bütün komandalarımıza uğurlar arzulayıram. Əsas mərhələyə adlamağın asan olmayacağını yaxşı dərk edirik. Buna baxmayaraq, məqsədimiz təsnifat mərhələsində bütün maneələri aşaraq birinci yeri tutmaqdır. Əgər bu reallaşmasa, mübarizəni Avropa Kubokunda davam etdirəcəyik”.

Rəqibin oyun üslubuna da toxunan türkiyəli mütəxəssis, heyətlər tam formalaşmadıqdan sonra dəqiq təhlil aparmağın erkən olduğunu bildirib: “VEF zəngin avrokubok ənənələrinə sahibdir. Onlar həmişə sərt və fiziki baxımdan güclü basketbol nümayiş etdirirlər. Rəqib kimi, biz də hələ ki heyətimizi tam formalaşdırmamışıq. Bu səbəbdən onların indiki gücünü dəqiq qiymətləndirmək çətindir. Riqa təmsilçisinin heyəti tam bəlli olduqdan sonra daha detallı təhlillər aparacağıq”.