Doqquz illik tarix, doqquz möhtəşəm mərasim və yüzlərlə nominant — FIFA-nın “The Best” mükafatı səssizcə futbol salnaməsinin arxivinə köçür. FIFA prezidenti Canni İnfantino Dubayda keçirilən Dünya İdman Sammitində “The Best” layihəsinin başa çatdığını və qurumun yeni mükafatının Dubayda təsis ediləcəyini rəsmən elan etdi.
“The Best” 2016-cı ildə FIFA-nın “France Football” jurnalı ilə tərəfdaşlığı bitdikdən sonra yaranmışdı. “Qızıl top”a rəqib kimi doğulan bu mükafat qısa müddətdə böyük nüfuz qazandı. Bu illər ərzində mükafatı qazananlar arasında: Lionel Messi (3 dəfə), Kriştiano Ronaldo, Robert Levandovski (hərəsi 2 dəfə), Luka Modriç və Vinisius Junior (hərəsi 1 dəfə) yer alıb.
Mükafatın sonuncu qalibi kimi tarixə 2025-ci ilin nəticələrinə görə Osman Dembele düşdü. Onunla yanaşı, Luis Enrike “İlin məşqçisi”, Aitana Bonmati isə qadın futbolunda növbəti dəfə ən yaxşı seçildi.
FIFA-nın bu addımı idman ənənələrindən daha çox geosiyasi və iqtisadi maraqlarla izah olunur. Dubay İdman Şurası ilə tərəfdaşlıq çərçivəsində təqdim olunacaq yeni mükafatın adı hələlik gizli saxlanılır. İlk mərasimin 2026-cı ildə keçirilməsi planlaşdırılır. FIFA rəsmi mükafatlandırma mərkəzini Avropadan Fars körfəzinə köçürür. Yeni mükafatın nominasiya meyarları və formatı hələlik açıqlanmayıb. Layihənin Dubayda mövcud olan “Globe Soccer Awards” ilə birləşəcəyi və ya onu əvəz edəcəyi ehtimal olunur. “The Best” heç bir qalmaqal və ya korrupsiya ittihamı olmadan, sadəcə rəhbərliyin qərarı ilə fəaliyyətini dayandırdı. Beləliklə, futbol dünyasının ən nüfuzlu mükafatlarından biri “pulun pulla nikahı” naminə öz yerini Dubayın göydələnlərinə güzəştə getdi.