İngiltərə millisi 60 illik həsrətə son qoymaq niyyəti ilə hazırlaşdığı dünya çempionatında gözlənilməz problemlə üzləşib. Komandanın seçdiyi “The Inn at Meadowbrook” (Kanzas) hoteli kəskin tənqid hədəfinə çevrilib.

Hotelin əvvəlki qonaqları burada “daş kimi sərt” çarpayılar, zəif səs izolyasiyası və yüksək səs-küydən şikayətləniblər. Baş məşqçi Tomas Tuxel və İngiltərə Futbol Assosiasiyası bu problemi kökündən həll etmək qərarına gəlib. Britaniya İdman İnstitutunun mütəxəssisləri bütün otaqlardakı döşəkləri və yastıqları xüsusi sifarişlə əvəzləyirlər. Hər oyunçu üçün onun fiziki parametrlərinə, çəkisinə və yuxu vərdişlərinə uyğun fərdi “yuxu dəstləri” hazırlanıb, hətta yay istisində bədən temperaturunu tənzimləyən soyuducu yastıqlar da nəzərə alınıb.

Bütün mənfi rəylərə baxmayaraq, İngiltərənin bu məkanı seçməsinin əsas səbəbi coğrafi amildir. Kanzasda məskunlaşmaq oyunların keçiriləcəyi məkanlara səyahət müddətini minimuma endirməyə imkan verir – eyni strategiyanı Argentina, Niderland və Əlcəzair yığmaları da tətbiq edir. İngilislər turnirdə ilk matçını iyunun 17-də, Texasın Arlinqton şəhərində Xorvatiyaya qarşı keçirəcək.