Dünya Çempionatının həlledici matçında İspaniya millisinə məğlub olan Argentina yığması nəinki titulu əldən verdi, həm də tarixi bir antirekorda imza atdı.

İspaniyanın tam üstünlüyü şəraitində keçən görüşün əsas vaxtında Argentina millisi rəqib qapısına bir dəfə belə dəqiq zərbə endirə bilməyib. Əvəzində, “albiseleste”nin qapıçısı Emiliano Martinez bir neçə epizodda komandasını real qoldan xilas edərək oyunda qalmağı bacarıb. Matçın gedişatından narazı qalan argentinalı futbolçuların sərt və aqressiv oyunu isə sonda komandanın azlıqda qalması ilə nəticələnib.

Gərgin keçən görüşün əsas vaxtına əlavə olunmuş 3-cü dəqiqədə, artıq sarı vərəqəsi olan Entso Fernandes Pau Kubarsiyə qarşı kobud oynayıb. Baş hakim Slavko Vinçiç tərəddüd etmədən “Çelsi”nin ulduz futbolçusunu ikinci sarı vərəqə ilə cəzalandıraraq meydandan qovub.

“Squawka”nın məlumatına görə, bu qırmızı vərəqə Argentina yığmasını Dünya Çempionatlarının finallarında ən çox qırmızı vərəqə alan komandaya çevirib. Xatırladaq ki, 1990-cı ilin həlledici matçında da iki argentinalı futbolçu – Pedro Monson və Qustavo Desotti meydandan qovulmuşdu. Azlıqda qalan Argentina əlavə vaxtda İspaniyanın müqavimətini qıra bilməyib. Ferran Torresin vurduğu yeganə qol (1:0) İspaniyaya dünya çempionu titulunu qazandırıb.