Mundial Niderland millisinin heyətində uğurlu çıxış edən Kodi Qakponun ailəsində faciə yaşanıb. Futbolçunun həyat yoldaşı Noa van der Biy sosial şəbəkə hesabında ana bətnində olan körpələrini itirdiklərini açıqlayıb.
Mayda ikinci övladlarını gözlədiklərini elan edən cütlük, dünyaya gəlməmiş oğullarına Elayca Rafael Qakpo adını qoyublar. Noa van der Biy instaqram hesabında paylaşdığı kədərli ismarışda bu sözləri qeyd edib: “Böyük bir ürək ağrısı ilə bildiririk ki, oğlumuz hamiləlik dövründə tələf oldu. Sevginiz və dəstəyiniz üçün hər birinizə təşəkkür edirik. Həmişə bizim qəlbimizdə yaşayacaqsan”.
Qrup mərhələsində vurduğu 2 qolla diqqət çəkən 27 yaşlı “Liverpul” hücumçusunun mundialdakı iştirakını davam etdirib-etdirməyəcəyi hələlik məlum deyil. Xatırladaq ki, bir neçə gün öncə Niderland Kral Futbol İttifaqı (KNVB) Qakponun komandanın məşqinə gecikdiyini və bunun “ciddi bir səbəblə” bağlı olduğunu bildirmişdi.
Niderland yığması qrup lideri kimi pley-offa yüksəlib və iyunun 30-da 1/16 final mərhələsində Mərakeşlə qarşılaşacaq.