“Sabah”ın baş məşqçisi Valdas Dambrauskas Premyer Liqanın 27-ci turu çərçivəsində baş tutan “Zirə” ilə heç-heçəni (2:2) şərh edib. Litvalı mütəxəssis komandasının oyunundan razı qalsa da, buraxılan bəsit qollardan gileylənib.

Qarşılaşmanın yüksək tempdə keçdiyini vurğulayan Dambrauskas, komandasının ilk dəqiqələrdən üstün tərəf olduğunu bildirib: “Çox keyfiyyətli oyun izlədik. İlk dəqiqədən etibarən qələbə üçün mübarizə apardıq, topa sahib olduq və ardıcıl hücumlar qurduq. Rəqib isə oyuna bir xal üçün çıxmışdı və istəyinə nail oldu. Artıq ardıcıl üçüncü matçdır ki, hesabda geri düşürük, sonra isə vəziyyəti bərabərləşdirməli oluruq”.

Təhlillərin vacibliyini qeyd edən baş məşqçi, müdafiədəki səhvlərə diqqət çəkib: “Bu gün meydanda dominant tərəf biz idik, lakin öz səhvlərimizdən qollar buraxdıq. Rəqib cəmi iki ciddi hücum etdi və hər ikisində fərqlənməyi bacardı. İkinci hissədə kifayət qədər şansımız oldu. Əlavə 3-4 dəqiqəmiz olsaydı, bəlkə də qələbə qolunu vuracaqdıq. Görünür, bu gün bizim günümüz deyilmiş. Niyə belə bəsit qollar buraxdığımızı anlamıram. Ciddi analizlər aparmalıyıq. Bu oyunu unudub, növbəti matçlara köklənməliyik”.

Dambrauskas digər komandaların nəticələri ilə maraqlanmadıqlarını və yalnız öz oyunlarına fokuslandıqlarını vurğulayıb: “Biz digər klubların nəticələrinə baxmırıq. Bizə heç kimin köməyi lazım deyil, yalnız öz performansımıza güvənirik”.