“Sabah”ın baş məşqçisi Valdas Dambrauskas Çempionlar Liqasının II təsnifat mərhələsi çərçivəsində sabah “KuPS”a qarşı keçirəcəkləri ilk oyunu dəyərləndirib.

Rəqibi Azərbaycanda salamlamaqla sözə başlayan mütəxəssis matça yüksək motivasiya ilə hazırlaşdıqlarını bildirib: “Ev sahibi kimi gözləntilərimiz böyükdür. Komanda oyunla bağlı bütün tapşırıqları yerinə yetirməyə hazırdır. Sabah meydana məqsədyönlü və maksimum konsentrasiya ilə çıxacağıq. Azarkeşlərimizi sevindirmək üçün əlimizdən gələni edəcəyik”.

“Sabah”ın əsas mərhələyə yüksəlmək şanslarını şərh edən Dambrauskas, qarşıdakı hədəflərə fokuslanmağın vacibliyini vurğulayıb: “Hələlik turnirin növbəti mərhələlərindən danışmaq tezdir. Kağız üzərində favorit sayıla bilərik, lakin bunu meydanda sübut etmək lazımdır. Hazırda yeganə hədəfimiz “KuPS” səddini aşmaqdır. Əgər bunu bacarsaq, o zaman gələcək rəqiblərdən danışa bilərik”.

Rəqibin çempionatda daha çox oyun keçirməsi və komandasının fiziki forması ilə bağlı suala isə litvalı mütəxəssis belə yanaşıb: “Rəqibin nə qədər oyun keçirməsi o qədər də önəmli deyil. Biz öz hazırkı durumumuza və qarşıdakı 90 dəqiqənin planına fokuslanmışıq. Hər mövsüm və hər rəqib fərqlidir. Əsas vəzifəmiz ən yaxşı heyəti seçmək və düzgün oyun planı ilə qələbə qazanmaqdır”.

Hücum xəttindəki rəqabətlə bağlı sualı cavablandıran baş məşqçi, hər zaman komanda üçün ən uyğun qərarları verməyə çalışdığını bildirib: “Mənim üçün əsas məsuliyyət komandanı qələbəyə kökləməkdir. Heyəti formalaşdırarkən həmin an ən hazır olan oyunçulara üstünlük verirəm. Seçim etmək məşqçinin işidir və hər zaman komandanın xeyrinə olan qərarı qəbul edirəm”. Sonda növbəti mərhələdəki potensial rəqiblərlə bağlı suala isə Dambrauskas gülümsəyərək belə cavab verib: “Artıq dediyim kimi, hazırda bütün fikrimiz yalnız sabahkı oyundadır. Bizim üçün ən vacibi budur”.