Gürcüstanın paytaxtı Tbilisi şəhərində start götürən böyüklər arasında Avropa çempionatının ilk günü Azərbaycan millisi üçün məhsuldar keçir. Komandamızın bir neçə üzvü artıq medallar uğrunda həlledici mərhələyə adlayıb.

Təsəlliverici görüşlərdə inamlı çıxış edən iki cüdoçumuz bürünc medal qazanmaq şansını qoruyub saxlayıb. Əhməd Yusifov (60 kq) fransalı rəqibi Roman Pikardı məğlub edərək üçüncü yer uğrunda görüşə vəsiqə qazanıb. Turan Bayramov (66 kq) isə moldovalı Radu İzvoreanunu üstələyərək bürünc medal mübarizəsinə qoşulub.

Günün ən uğurlu çıxışlarından birini Şəfəq Həmidova (48 kq) və Balabəy Ağayev (60 kq) nümayiş etdiriblər. Hər iki idmançımız rəqiblərini sıradan çıxararaq adlarını yarımfinala yazdırıblar. Onlar finala yüksəlmək üçün tatami üzərinə çıxacaqlar.

əəssüf ki, qadınların mübarizəsində Könül Əliyeva (48 kq), Gültac Məmmədəliyeva və Leyla Əliyeva (hər ikisi 52 kq) rəqiblərinə məğlub olaraq turnirdə çıxışlarını başa vurublar.

Xatırlada ki, qitə çempionatına millimiz 15 cüdoçu (9 kişi və 6 qadın) ilə təmsil olunur. Aprelin 19-dək davam edəcək yarışda növbəti günlərdə digər çəki dərəcələrində də idmançılarımız mübarizəyə qoşulacaqlar.