UEFA Çempionlar Liqasının I təsnifat mərhələsinin ilk oyununda Bakıda Uelsin TNS (Nyu-Sents) klubunu 2:0 hesabı ilə məğlub edən “Sabah”ın almaniyalı hücumçusu Coy-Lens Mikels qarşılaşma ilə bağlı təəssüratlarını bölüşüb.

Təcrübəli forvard turnirdəki debüt matçının gözləniləndən çətin keçdiyini və rəqibin yalnız müdafiə haqqında düşündüyünü bildirib: “Həqiqətən də çox yaxşı oyun alındı. Çempionlar Liqasında ilk təcrübəmiz olduğu üçün müəyyən çətinliklərlə üzləşdik. Üstəlik, yalnız müdafiəyə qapanan və hücumu düşünməyən komandaya qarşı oynayırdıq. Belə sıx müdafiə səddini yarmaq, boşluqlar tapmaq həmişə çətindir. İlk qoldan sonra rəqibin daha açıq futbol oynayacağını gözləyirdik, lakin hesab 2:0 olduqdan sonra da üslublarını dəyişmədilər. Buna baxmayaraq, istəyimizə çatdıq və qələbə qazandığımız üçün şadıq”.

Mikels Uelsdə keçiriləcək cavab görüşünün tamam fərqli məcrada baş tutacağını və daha çox qol vurmaq şanslarının yaranacağını vurğulayıb: “Gələn həftə rəqiblə onların meydanında qarşılaşacağıq. Səfər matçında daha çox qol vuracağımıza inanıram. Çünki mərhələ keçmək üçün onlar artıq hücum etməyə və hesabdakı geriliyi aradan qaldırmağa məcburdurlar. Əks halda turnirlə vidalaşmalı olacaqlar. Rəqibin məcburən açılması meydanda daha çox boşluqların yaranmasına gətirib çıxaracaq. Ümid edirəm ki, səfərdə Çempionlar Liqasındakı ilk qollarımı vuraraq bu imkanlardan maksimum yararlanacağıram”.

31 yaşlı hücumçu “Sabah”ın turnirdəki ümumi hədəfləri barədə danışmağın hələ tez olduğunu diqqətə çatdırıb: “Qarşıda uzun yol var. Əlbəttə, mümkün qədər irəli getmək istəyirik. Lakin hazırda bütün diqqətimizi cavab görüşünə yönəltmişik. Bu mərhələni adladıqdan sonra növbəti rəqibimiz barədə düşünəcəyik”.