“Sabah” Çempionlar Liqasının II təsnifat mərhələsində ilk sınağına çıxır. Valdas Dambrauskasın rəhbərlik etdiyi kollektiv Finlandiyanın “KuPS” klubunu qəbul edəcək. Şimallılarla ilk duelin evdə keçirilməsi səfər matçı öncəsi üstünlük qazanmaq baxımından “bayquşlar” üçün əla fürsətdir. Təbii ki, bunun üçün doğma divarlar arasında maksimum əzmkar oyun nümayiş etdirmək lazımdır.

 Əvvəlki mərhələnin nəticələri budəfəki qarşılaşmaya nikbin yanaşmağa əsas verir. “Sabah” potensialını tam ortaya qoyarsa, evdə növbəti “quru” və inamlı qələbəsini qazana bilər. Lakin rəqibi də kiçimsəmək olmaz. “KuPS” ilk mərhələdə Şimali Makedoniyanın “Vardar” klubunu səfərdə məğlub etməklə (2:0) təhlükəli rəqib olduğunu sübut edib. Finlandiyadakı cavab matçının çətin keçməsi (əlavə vaxtda – 3:2) onların səfərdəki inamlı oyununun üzərinə kölgə salmır.

Ümumilikdə, təmsilçimizin uğurlu nəticə qazanmaq şansı yüksəkdir. “KuPS” əvvəlki rəqibdən daha ciddi sədd olsa da, “Sabah”ın gücü çatan rəqibdir. Əsas odur ki, komandamız diqqətli oynasın və meydanda özü-özünə əlavə problemlər yaratmasın.

20:00. “Sabah” (Azərbaycan) – “KuPS” (Finlandiya)

Masazır, “Bank Respublika Arena” stadionu

Baş hakim: Lukaş Kujma.