Azərbaycan Premyer Liqasının I turunda “İmişli” ilə qolsuz bərabərə qalan “Araz-Naxçıvan”ın baş məşqçisi Cavid Hüseynov matçdan sonra keçirilən mətbuat konfransında qarşılaşmanı dəyərləndirib və komandanın qarşıdakı planlarından danışıb.

Yeni mövsüm barədə danışan Naxçıvan təmsilçisinin baş məşqçisi bildirib: “Yeni mövsümün başlaması münasibətilə bütün futbol ictimaiyyətini təbrik edirəm. Bilirdik ki, bizi çətin oyun gözləyir. Hazırlığa bir qədər gec başladığımız üçün cəmi 5 həftə məşq etmək imkanımız oldu. Buna baxmayaraq, futbolçuların mübarizəsindən razı qaldım. Potensialımızın daha yüksək olduğunu bilirik. Qarşıdakı məşqlərdə çatışmazlıqlar üzərində çalışaraq növbəti oyunlarda daha yaxşı nəticələr qazanmağa çalışacağıq”.

Komandanı qarşıda “Neftçi”, “Sabah” və “Qarabağ” kimi iddialı rəqiblərlə ard-arda ağır sınaqlar gözləyir. Baş məşqçi bu matçlara hazırlıq prosesi barədə fikirlərini bölüşüb: “Bəli, bizi qarşıda ağır oyunlar gözləyir. Bu çempionat daha maraqlı olacaq. Bütün rəqiblərə qarşı eyni qaydada hazırlaşacağıq. Çalışacağıq ki, yaxşı nəticələr qazanaq”.

“Araz-Naxçıvan”dakı mövcud iş şəraitindən və klub rəhbərliyinin münasibətindən danışan Cavid Hüseynov dəstəyi xüsusi vurğulayıb: “Fürsətdən istifadə edib rəhbərliyə təşəkkür etmək istəyirəm. Mənə çox dəstək olurlar. İstədiyimiz futbolçuları komandaya cəlb ediblər”.

Azarkeşlərin maraqla gözlədiyi, “Neftçi”nin sabiq yarımmüdafiəçisi Mamadou Kanenin meydana nə vaxt çıxacağı ilə bağlı suala baş məşqçi aydınlıq gətirib: “Komandaya ən son qoşulanlardan biri Kanedir. Ona görə çox da risk etmək istəmirik. Optimal formaya gəlməsi üçün hələ vaxt lazımdır. Fiziki durumunu düzəldəndən sonra onu meydanda görəcəyik”.v