Cənubi Koreya Futbol Assosiasiyası (KFA) ətrafında ciddi qalmaqal alovlanıb. Koreyanın JTBC televiziya kanalının apardığı araşdırma nəticəsində məlum olub ki, 2011-ci ildə qurum milli komandanın matçlarından öncə xarici referilərə dəfələrlə cinsi xarakterli xidmətlər təşkil edib.

JTBC-nin yaydığı məlumatda bildirilir ki, Assosiasiya 2011-ci il ərzində ümumilikdə 7 matçdan öncə 10-a yaxın xarici hakim üçün bu cür «xidmətlər» təşkil edib. Həmin qarşılaşmaların sırasına təkcə yoldaşlıq görüşləri deyil, həm də DÇ-2014-ün seçmə mərhələsi və 2012-ci il London Olimpiadasının həlledici təsnifat oyunları daxildir.

Araşdırma göstərib ki, federasiya əməkdaşları Seul, Çanqvon, Ulsan və digər şəhərlərdə yerləşən masaj salonlarının yüz minlərlə vonluq hesablarını qurumun korporativ bank kartları vasitəsilə ödəyiblər. O dövrdə assosiasiyada çalışmış keçmiş əməkdaşlardan biri verdiyi açıqlamada həmin vaxtlar bunun «adi hal və vərdiş edilmiş təcrübə» olduğunu etiraf edib.

Yaranmış vəziyyətlə bağlı Cənubi Koreya Futbol Assosiasiyası da rəsmi münasibət bildirib: «Ehtimal ki, 15 il əvvəl belə bir xoşagəlməz insident baş verib. Lakin hazırda qurumumuzda ciddi daxili nəzarət mekanizmləri tətbiq olunub və bu kimi halların qarşısının alınması üçün bütün lazımi tədbirlər görülür».

JTBC kanalı yaxın vaxtlarda araşdırmanın yeni və daha təfərrüatlı məqamlarını ictimaiyyətə təqdim edəcəyini açıqlayıb.