Argentina nəhəngi “Boka Xuniors” ev oyunları zamanı məzmun istehsal edən bloqer və inflyuenserlərin fəaliyyətinə məhdudiyyət tətbiq etməyə başlayıb. Avqustun 28-də “Lanus”la keçiriləcək qarşılaşmadan etibarən “La Bombonera” stadionunda icazəsiz canlı yayım açmaq və oyun boyu fasiləsiz video çəkiliş aparmaq qadağan ediləcək.

Yerli mətbuatda “Anti-TikToker qaydaları” adlandırılan bu qərara əsasən, mövsümlük abonement sahibləri tribunadakı yerlərindən sosial şəbəkələr üçün davamlı kontent platforması kimi istifadə edə bilməzlər. Qaydanı pozan azarkeşlər abonement hüququndan məhrum ediləcək və barələrində intizam işi açılacaq.

Lakin klub telefonla çəkilişə tam qadağa qoymur. Azarkeşlərin qol anlarını, stadion atmosferini və ya qısa epizodları lentə almasına icazə verilir. Əsas hədəf bütün oyunu canlı yayımlayan və ya matç boyu öz reaksiya videolarını çəkənlərdir.

Qərar bəzi kontent yaradıcılarının etirazına səbəb olsa da, klubun ənənəvi azarkeşləri addımı dəstəkləyib. Onların fikrincə, insanlar tribunaya özlərini çəkmək üçün deyil, futbola baxmağa gəlməlidirlər. “Boka Xuniors” rəhbərliyi də məhz eyni mövqedən çıxış edir: dünya futbolunun ən çılğın atmosferlərindən birinə sahib olan “La Bombonera”nın TikTok, YouTube və digər sosial platformalar üçün sadəcə bəzəkli reklam meydançasına çevrilməsinin qarşısını almaq.